საქართველოს განათლებისა და მეცნიერების მინისტრი მიხეილ ჩხენკელი ცნობილ ენათმეცნიერსა და ფილოლოგს, დამანა მელიქიშვილს ეწვია და დედაენის დღე მიულოცა. ამის შესახებ ინფორმაციას განათლებისა და მეცნიერების სამინისტრო ავრცელებს.

მათივე ცნობით, მიხეილ ჩხენკელმა და დამანა მელიქიშვილმა ქართული ენისათვის სახელმწიფო სტატუსის მინიჭების საქმეში თბილისის სახელმწიფო უნივერსიტეტის როლსა და მნიშვნელობაზე ისაუბრეს.

„დამანა მელიქიშვილი 1978 წლის 14 აპრილს განვითარებული მოვლენების მომსწრე და თვითმხილველია. ის, როგორც ივანე ჯავახიშვილის სახელობის თბილისის სახელმწიფო უნივერსიტეტის ლექტორი, საპროტესტო მოძრაობაში ჩართულ სტუდენტებს დიდ მხარდაჭერას უწევდა.

მიხეილ ჩხენკელმა და დამანა მელიქიშვილმა ქართული ენისათვის სახელმწიფო სტატუსის მინიჭების საქმეში თბილისის სახელმწიფო უნივერსიტეტის როლსა და მნიშვნელობაზე ისაუბრეს და აღნიშნეს, რომ საზოგადოებაში სწორედ ამ დღეს გაჩნდა ის მუხტი, რომელმაც საბოლოოდ ეროვნულ-განმათავისუფლებელი მოძრაობის მიერ საქართველოს დამოუკიდებლობის აღდგენა მოიტანა.

დამანა მელიქიშვილს მნიშვნელოვანი წვლილი მიუძღვის ქართველოლოგიური საკითხების, ქართული ზმნისა და ქართული ფილოსოფიური ენის შესწავლის საქმეში. იგი არის მნიშვნელოვანი სამეცნიერო ნაშრომების ავტორი. მიღებული აქვს არაერთი საპატიო ჯილდო, მათ შორის, ღირსების ორდენი და დავით აღმაშენებლის სახელობის პრემია“, - აღნიშნულია განცხადებაში.