რაიმე ტიპის საფრთხე, რომ „ქართულ ოცნებას" არ ჰქონდეს უმრავლესობა და ქვეყნის მართვის სადავეები, გამორიცხულია, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა ჟურნალისტებთან, უმრავლესობიდან 6 დეპუტატის გასვლის კომენტირებისას განაცხადა.

მისი თქმით, რაიმე კრიზისის საფრთხე ამ მიმართულებით გამორიცხულია და „ქართულ ოცნებას" გადაწყვეტილებების მიღების პროცესში საფრთხე არ შეექმნება.

„რა თქმა უნდა, „ქართული ოცნების" გუნდს ექნება სრული უმრავლესობა ყველა იმ მნიშვნელოვანი გადაწყვეტილების მიღებისთვის, რომელიც სჭირდება ჩვენს ქვეყანას და ჩვენ საზოგადოებას. აქედან გამომდინარე, რაიმე ტიპის საფრთხე რომ „ქართულ ოცნებას" არ ჰქონდეს უმრავლესობა და ქვეყნის მართვის სადავეები, რათა მიღებულ იქნეს ისეთი გადაწყვეტილებები, რომელიც სჭირდება ჩვენს საზოგადოებას და სახელმწიფოს, ასეთი რისკები გამორიცხულია და არ არსებობს“, - განაცხადა ოხანაშვილმა.

მისივე თქმით, „ქართულ ოცნებას" აქვს გარკვეული პრინციპები, რომელიც არის „გუნდის ერთგულება, სიმტკიცე და სახელმწიფოებრივი მიდგომა", თუმცა, „ყველას არ შეუძლია ამ პრინციპების ერთგულება პოლიტიკაში."

„პირადი ინტერესებისთვის ადგილი არ უნდა იყოს და არ შეიძლება სუბიექტური მიდგომით იღებდე გადაწყვეტილებას რომელ გუნდში იქნები,"- განაცხადა ოხანაშვილმა.

ამასთან, ოხანაშვილი მიიჩნევს, რომ შეკითხვა - არის თუ არა გახარია და მისი პოლიტიკური გუნდი ვინმესთან, მათ შორის ბიძინა ივანიშვილთან დაკავშირებული, ლოგიკურია, თუმცა, მას არ აქვს ამასთან დაკავშირებით რაიმე ეჭვები.

ცნობისათვის, „ქართული ოცნების“ დეპუტატებმა - გიორგი ხოჯევანიშვილმა, ალექსანდრე მოწერელიამ, ბექა ლილუაშვილმა, შალვა კერესელიძემ, მიხეილ დაუშვილმა და ანა ბუჩუკურმა მმართველი პარტია დატოვეს. ამასთან, ისინი პოლიტიკურ საქმიანობას გიორგი გახარიასთან ერთად გააგრძელებენ.