სომხეთის პრეზიდენტს, ბატონ სარქისიანს გავაცანი საქართველოს ოკუპირებულ ტერიტორიებზე არსებული ვითარება, უკანონო ბორდერიზაცია, გატაცებები, ადამიანთა უფლებების ხელყოფა, ჰუმანიტარული მდგომარეობის დამძიმება, ამ პანდემიის დროს, მითუმეტეს და ესკალაცია, - ამის შესახებ საქართველოს პრეზიდენტმა სალომე ზურაბიშვილმა, სომხეთის პრეზიდენტ არმენ სარქისიანთან შეხვედრის დასრულების შემდეგ განაცხადა.
მისივე თქმით, ყველას კარგად გვესმის, რომ ნებისმიერი კონფლიქტი რეგიონში მთლიანად რეგიონს აზარალებს, ამიტომ მშვიდობა და თანამშრომლობა უალტერნატივოა კავკასიის განვითარებისთვის.
„რეგიონში სტაბილურობის მნიშვნელობიდან გამომდინარე, განვიხილეთ, ასევე, უკრაინაში შექმნილი საგანგაშო ვითარება. ესკალაცია და დესტაბილიზაცია ემუქრება შავი ზღვის რეგიონს და არა მხოლოდ. ჩვენ გვესმის, რამდენად მნიშვნელოვანია ამ რეგიონისთვისაც დღეს დეესკალაცია. განვიხილეთ ჩვენი რეგიონის სამომავლო პოტენციალი, რომელიც უნიკალურია ეკონომიკის კუთხით. გაზრდილი ინტერესი, სხვადასხვა გარე აქტორებისგან, ახალი გეგმები თუ პლატფორმები, რომლის შესახებაც ისმის, ადასტურებს ამ რეგიონის ძალიან დიდ მნიშვნელობას, თუმცა კავკასიის ქვეყნების როლი გადამწყვეტი რჩება. კავკასიის მომავალი კავკასიის ქვეყნებმა ერთობლივად უნდა განსაზღვრონ“, - განაცხადა სალომე ზურაბიშვილმა.