ვისაუბრეთ ორმხრივ ურთიერთობებზე, ეკონომიკური, ტურისტული პროექტების გაძლიერებასა და განხორციელებაზე - განვიხილეთ ინიციატივა, როგორ შევუწყოთ ხელი ბიზნესაქტორებს, რომ კონკრეტულ პროექტებზე მუშაობა დავიწყოთ, - ამის შესახებ საქართველოს პრეზიდენტმა სალომე ზურაბიშვილმა სომხეთის პრეზიდენტ არმენ სარქისიანთან შეხვედრის დასრულების შემდეგ განაცხადა.

მისივე თქმით, საქართველოს მხრიდან მეტი უნდა გაკეთდეს, რომ ქვეყანაში მცხოვრები სომხური წარმოშობის მოქალაქეები სახელმწიფო ენას სრულყოფილად დაეუფლონ და ეკონომიკურ- პოლიტიკური ინტეგრაცია მიიღონ.

„კავკასია თავის სატრანზიტო და სხვა პოტენციალის გათვალისწინებით მხოლოდ ღია რეგიონად წარმოგვიდგენია. ვისაუბრეთ ჩვენს ორმხრივ ურთიერთობებზე ეკონომიკური, ტურისტული პროექტების გაძლიერებასა და განხორციელებაზე. საქართველოში სომხური წარმოშობის მოქალაქეები სარგებლობენ ყველა საშუალებებით, რათა შეინარჩუნონ წინაპართა ენა და კულტურა. ამავე დროს მეტი უნდა გაკეთდეს ძირითადად სახელმწიფოს მხრიდან, რათა სახელმწიფო ენას სრულყოფილად დაეუფლონ და ქვეყნის ეკონომიკური, თუ პოლიტიკური ინტეგრაცია მიიღონ“, - განაცხადა პრეზიდენტმა.

მანვე აღნიშნა, რომ ორ ქვეყანას შორის ახლობლური ურთიერთობა შენარჩუნდა და დროთა განმავლობაშიც შენარჩუნდება.

„მოხარული ვარ, ამ ვიზიტით, ასევე განვიხილეთ ზოგიერთი ინიციატივა, თუ როგორ შევუწყოთ ხელი ბიზნესაქტორებს, რომ კონკრეტულ პროექტებზე მუშაობა და ფიქრი დავიწყოთ, ეს მსჯელობა გაგრძელდება და კონკრეტულ ფორმას მივცემთ. ძალიან ბედნიერი ვარ, რომ ასეთი ახლობლური ურთიერთობა შენარჩუნდა და დროთა განმავლობაში შენარჩუნდება“, - განაცხადა ზურაბიშვილმა.