კარგი იქნება, თუკი ვახტანგ მეგრელიშვილი თავს ზეციდან მოვლენილ კანონმდებლად არ ჩათვლის, - ამის შესახებ ჟურნალისტებს პარლამენტის პირველმა ვიცე-სპიკერმა გია ვოლსკიმ განუცხადა.

ვოლსკი ასევე ამბობს, რომ ვახტანგ მეგრელიშვილისთვის იარაღია ლოგიკა, მისი საუბრის მანერა, მის მიერ ჩამოყალიბებული თეზისები, რომელიც პოლიტიკურ ცხოვრებაში სიახლეა.

„მას იარაღი არ სჭირდება, სიტყვაა მისი იარაღი. სერიოზულობასთან დაკავშირებით გვაქვს პრეტენზიები და არა მხოლოდ მეგრელიშვილთან, მაგრამ თუ მას აქვს მოსაზრებები, მას რეალიზაცია მხოლოდ იმ შემთხვევაში უწერია, თუ კანონის სახეს მიიღებს. ამ ქვეყანაში კანონების შემოქმედი პარლამენტია", - განაცხადა გია ვოლსკიმ.

ვოლსკის თქმით, იმის მიუხედავად, რომ „ქართული ოცნების" ხედვები „გირჩის" შეხედულებებისგან რადიკალურად განსხვავდება, „პოლიტიკური პარტია, ვინც ნაბიჯს გადადგამს, ამომრჩევლის სურვილს შეასრულებს და საქართველოში სტაბილური ვითარების შენარჩუნებას მოემსახურება, ისტორიის წინაშე მართალი იქნება".

„ისტორია დაგვანახებს, რომ მწვავე დაპირისპირების მიუხედავად, შეფასება იმ ნაბიჯებიდან გამომდინარე იქნება გაკეთებული, რომელსაც ურთულეს ეტაპზე ესა თუ ის პოლიტიკური სუბიექტი გააკეთებს", - დასძინა გია ვოლსკიმ.