საქართველოს პარლამენტის კარი გახლავთ ღია ყველა იმ პოლიტიკური პარტიისთვის, ვინც ხალხმა აირჩია და ვინც ჯერ კიდევ არ არის წარმოდგენილი პარლამენტში, - ამის შესახებ საქართველოს პარლამენტის თავმჯდომარემ, არჩილ თალაკვაძემ მმართველი პარტიის ოფისში გამართულ ბრიფინგზე განაცხადა.
როგორც თალაკვაძემ აღნიშნა, შესაბამისად, „გირჩს“ აქვს სრული უფლება ჩაერთოს საპარლამენტო მუშაობაში.
„რასაკვირველია, ჩვენი მიზანი და პრიორიტეტია პარლამენტი იყოს ზუსტად იმ სახით წარმოდგენილი, როგორც ის საზოგადოებამ აირჩია“, - განაცხადა თალაკვაძემ.
ამასთან, თალაკვაძემ აღნიშნა, რომ აშკარაა, ოპოზიცია გაყოფილია ორ ნაწილად; ერთი, მისივე შეფასებით, „არის გაკოტრებული დესტაბილიზაციის გეგმის გარშემო გაერთიანებული, მეორე ნაწილი კი, ფიქრობს გამოსავალზე“.
„ქართული ოცნება“ არ არის ის, ვინც უნდა თქვას, როგორ მოიქცევა ოპოზიცია. ჩვენი მხრიდან არის გადადგმული ის აუცილებელი ნაბიჯები, რომ ასეთი შეთანხმება შედგეს როგორც მინიმუმ ოპოზიციის ჯანსაღ ნაწილთან, ვისაც მართლა აინტერესებს ნორმალური პოლიტიკური პროცესი, დემოკრატია და არჩევნები ამ ქვეყანაში. თუ რა ნაბიჯს გადადგამენ ისინი, ამას ვნახავთ. თუმცა, აშკარაა, რომ ოპოზიცია არის გაყოფილი ორ ნაწილად, ერთი არის გაკოტრებული დესტაბილიზაციის გეგმის გარშემო გაერთიანებული. მეორე ნაწილი ფიქრობს გამოსავალზე. ვფიქრობთ, დოკუმენტის ხელმოწერის გარდა დამატებით გამოსავალსაც ვთავაზობთ“, - განაცხადა თალაკვაძემ.