დავით სარალიძის განზრახ ჯგუფურად მკვლელობაში ბრალდებული გიორგი მენაბდის ადვოკატის, დავით დადიანის განცხადებით, მისი დაცვის ქვეშ მყოფი ერთი პირის ჩვენების საფუძველზე დააკავეს. დადიანი ბრალდებულის აღკვეთის ღონისძიების გარეშე დატოვებას მოითხოვს.

"ეს ჩვენებები უცხო, ახლად აღმოჩენილი პირისგან არ არის. ეს არის იმ პირის მხრიდან, რომელსაც სასამართლომ განაჩენი დაუდგინა და ამასთან დაკავშირებით დაკითხულია. საკითხავია, ეს ჩვენება რისთვის გაჩნდა, ძალიან ბევრი ეჭვი მაქვს, მაგალითად, ადამიანი იმყოფება პატიმრობაში და ვთქვათ, თავის დაღწევა უნდა, ან ვიღაც ზემოქმედებას ახდენს, ან ვიღაცის ინტერესია. მტკიცებულებათა ერთობლიობას როცა ასახელებენ, უნდა თქვან, ეს ერთობლიობა არ არის, როცა მხოლოდ ერთი ჩვენების საფუძველზე ხდება ადამიანის დაკავება, ამას მტკიცებულებათა ერთობლიობას არ ვუწოდებ. დასაბუთებული ვარაუდის შექმნისთვისაც კი საჭიროა გარკვეული სტანდარტი. თუ ბარბაქაძეზეა საუბარი, 9 სასამართლოშია მიცემული ჩვენება, როგორ შეიძლება 9 სასამართლოში მიცემული ჩვენება უარყო და ერთს დაეყრდნო და ამას შეიძლება მტკიცებულებათა ერთობლიობა დაერქვას?"- განაცხადა დადიანმა.