ვახტანგ მეგრელიშვილი - ინიციატივა, რაც „ქართულმა ოცნებამ“ გამოიჩინა, მისასალმებელია -  თუ შეთანხმება მოხდა, ჩვეულებრივად შევდივართ, როგორც სრულფასოვანი პარლამენტის წევრები

ძალიან გვიხარია, იმედი გვაქვს, შეთანხმება მოხდება და პარლამენტი სრულფასოვანი იქნება, - ამის შესახებ „გირჩის“ ერთ-ერთმა ლიდერმა, ვახტანგ მეგრელიშვილმა „პალიტრანიუსის“ ეთერში, გადაცემაში „360 გრადუსი“ განაცხადა, რითაც დანიელსონის მიერ წარდგენილ დოკუმენტზე მმართველი გუნდის ხელმოწერა შეაფასა.

ამასთან, როგორც მეგრელიშვილი აცხადებს, „ქართული ოცნების“ ინიციატივა მისასალმებელია.

„ოფისში ვხუმრობდით, რომ „ქართულმა ოცნებამ“ საღამოს გადაგვფარა. დილით ვთქვით, რომ პარლამენტის შენობაში მივდიოდით ორშაბათს იმ ფორმით, რაც დაანონსებული გვქონდა, ამან ინტერესი გამოიწვია ჟურნალისტებში, საღამოს კი ჩვენთვის მოულოდნელად, არჩილ თალაკვაძემ ასეთი განცხადება გააკეთა.

ძალიან გვიხარია. ჩვენი გეგმა იმ შემთხვევაში იყო შემუშავებული, როდესაც შეთანხმება ვერ ხდებოდა. იმედი გვაქვს, რომ ეს შეთანხმება მოხდება და პარლამენტი სრულფასოვანი იქნება. ჩვენი მოთხოვნა იყო პარლამენტი გვქონოდა, იქ შესაძლებელი ყოფილიყო საუბარი. ეს ინიციატივა, რაც „ქართულმა ოცნებამ“ გამოიჩინა, ჩემი აზრით, ძალიან მისასალმებელია. ახლა მთავარია დაზუსტდეს, ბევრი კითხვები არსებობს“,-აცხადებს მეგრელიშვილი.

ამასთან, როგორც მეგრელიშვილი დასძენს, თუ ხელისუფლებასა და ოპოზიციას შორის შეთანხმება შედგება, „გირჩი“ საპარლამენტო საქმიანობაში მონაწილეობას მიიღებს.

„თუ შეთანხმება მოხდა, ჩვეულებრივად შევდივართ, როგორც სრულფასოვანი პარლამენტის წევრები, სრულად მივიღებთ მონაწილეობას. ჩვენ ორშაბათიდან გავარკვევთ სიტუაციას ბევრად უფრო მარტივად და ადეკვატურად, ვიდრე შეიძლებოდა იმ ფორმატში გაგვერკვია, სადაც ახლა ვართ“, -აცხადებს მეგრელიშვლი.

შეგახსენებთ, „ქართული ოცნება“ მედიატორის მიერ შექმნილ დოკუმენტს ხელს საჯაროდ აწერს. როგორც პარლამენტის თავმჯდომარე არჩილ თალაკვაძე აცხადებს, „ქართული ოცნება“ საჯაროდ აწერს ხელს ევროკავშირისა და ევროპული საბჭოს პრეზიდენტის შარლ მიშელის ეგიდით შექმნილ დოკუმენტს, რომელიც მიშელის სპეციალურმა წარმომადგენელმა საქართველოში კრისტიან დანიელსონმა წარადგინა.

ხათუნა ლაგაზიძე - თუ ოპოზიციას რაციონალიზმი კი არა, თვითგადარჩენის ინსტინქტი მაინც შერჩენია, მოუწევთ გაერთიანება იმ საფრთხის წინააღმდეგ, რასაც ასპარეზზე ახალი პოლიტიკური ჯგუფების გამოჩენა ჰქვია
ქართული პრესის მიმოხილვა 07.05.2021
რამაზ საყვარელიძე - ოპოზიციიდან ბევრი შეეცდება სააკაშვილისგან გამიჯვნას და ლიდერის როლის მორგებას, მეეჭვება ეს წარმატებული მცდელობა იყოს, ამ ოპოზიციისთვის რთული იქნება სააკაშვილის დამარცხება
„გაგუას კლინიკაში“ covid 19–ის საწინააღმდეგო ვაქცინაციის კაბინეტი გაიხსნა
ბაქოში ევროპის ჩემპიონატის თასი ჩაიტანეს