ანა ბუჩუკური - დაპირისპირება და დაუსრულებელი დესტრუქცია დამაზიანებელი ფაქტორია და მნიშვნელოვნად ვნებს ქართული დემოკრატიის მშენებლობას
პოლიტიკური განაცხადის გაკეთებისთანავე ჩვენმა გუნდმა არაერთხელ აღვნიშნეთ, რომ არსებული გამოწვევებისა და საჭიროებების ფონზე, რომლის წინაშეც საქართველოს მოსახლეობა დგას, დაპირისპირება და დაუსრულებელი დესტრუქცია დამაზიანებელი ფაქტორია და მნიშვნელოვნად ვნებს ქართული დემოკრატიის მშენებლობასა და ევროპულ მომავალს, - ამის შესახებ უმრავლესობიდან წასული დეპუტატი ანა ბუჩუკური სოციალურ ქსელში წერს.
მისივე შეფასებით, გახარიას მიერ პრემიერ-მინისტრის თანამდებობიდან გადადგომამ გააჩინა სივრცე ქართულ პოლიტიკაში კონსტრუქციული ნაბიჯების დანერგვისა და შეთანხმების გზით სიარულის მიმართულებით, რაც კიდევ ერთხელ დაადასტურა მიმდინარე პროცესებმა.
„ის განცხადებები, რომელიც პერიოდულად ჟღერდება სხვადასხვა დასავლელი პარტნიორის მხრიდან, თამამად შეიძლება ითქვას, რომ სრულ თანხვედრაშია ჩვენი პოლიტიკური გუნდის დღის წესრიგთან. ჩვენ ღრმად გვწამს, რომ ევროატლანტიკურ სივრცეში ინტეგრაციის პროცესი ერთმნიშვნელოვნად მოითხოვს კომპრომისის ძიების და კრიზისიდან ქვეყნის გამოყვანისკენ სწრაფვას.
იმედი მაქვს, ეს პირველი ნაბიჯი არ იქნება მხოლოდ საჩვენებლად გაკეთებული და გამოიხატება სხვა, უფრო მნიშვნელოვან კონკრეტულ ქმედებებში!“ - წერს ანა ბუჩუკური.
