გამომდინარე იქიდან, რომ ჩვენ ჩვენი პოზიცია უკვე დავაფიქსირეთ და ხელიც მოვაწერეთ, გუშინდელ შეხვედრაზე საკონსულტაციო ჩვენი ოპონენტების მიმართულებით იყო - გადაწყვეტილება გუშინ მათ ჰქონდათ მისაღები, - ასე ხსნის უმრავლესობის დეპუტატი შალვა პაპუაშვილი ევროკავშირის წარმომადგენლობაში გამართულ შეხვედრაზე „ქართული ოცნების" არყოფნის მიზეზს.
„ჩვენ რამდენიმე დღის წინ ხელი მოვაწერეთ შარლ მიშლის პირადი წარმომადგენლის დენიელსონის მიერ შემუშავებულ დოკუმენტს. აღნიშნული დიკუმენტი პარტიებთან მრავალდღიანი კონსულტაციების შედეგად შემუშავდა. ჩვენ ამ შეთანხმებას უპირობოდ მოვაწერეთ ხელი.
ასევე ვიხილეთ ჩვენი ოპონენტების შეფასებები, რომ აღნიშნული შეთანხმების დოკუმენტი ფარატინა ქაღალდია. გამომდინარე იქიდან, რომ ჩვენ ჩვენი პოზიცია უკვე დავაფიქსირეთ და ხელიც მოვაწერეთ, გუშინდელ შეხვედრაზე საკონსულტაციო ჩვენი ოპონენტების მიმართულებით იყო. შესაბამისად, ბურთი ჩვენი ოპონენტების მხარესაა და გადაწყვეტილება გუშინ მათ ჰქონდათ მისაღები. როგორც ვნახეთ, ჩვენი ოპონენტები შეცვლილ დოკუმენტსაც იწუნებენ და არც ამ დოკუმენტზე სურთ ხელმოწერა", - განაცხადა შალვა პაპუაშვილმა.
მისივე თქმით, ცოტა გაუგებარია, რატომ აისახა გარკვეული საკითხები გუშინ წარმოდგენილ, შეცვლილ დოკუმენტში.
„ჩვენი გუნდის შეთავაზებაა, მხარდაჭერის 40%-იანი პრინციპი, რაც თავის მხრივ 8 მარტის შეთანხმების საფუძველზე შემოღებული ქვედა ზღვარია. ეს უკვე არის კონსტიტუციურ -სამართლებრივი რიცხვი. ყველა სხვა რიცხვი, ამ შემთხვევაში 43%, არის სხვა პრინციპი, თუმცა გუნდში განხილვისათვის მზად ვართ.
რაც შეეხება გიორგი რურუას თემას, ის პოლიტიკოსი არ არის. მსჯავრი აქვს იარაღის უკანონო ტარებაზე და ამ თემის პოლიტიკური შეთანხმების საკითხში შემოტანა მართლმსაჯულებაში პირდაპირი და უხეში ჩარევაა. ამიტომ ჩვენ ამას არ ვაპირებთ", - განაცხადა გიორგი პაპუაშვილმა.