დღეიდან 23 აპრილის ჩათვლით, საქართველოს წითელი ჯვრის საზოგადოება ჰიპერმარკეტ „გუდვილთან" ერთად ქავთარაძის ფილიალში საქველმოქმედო კამპანიას აგრძელებს. ამის შესახებ ინფორმაციას წითელი ჯვრის საზოგადოება ავრცელებს.
მათივე ინფორმაციით, მომხმარებლებს საშუალება ექნებათ შეიძინონ ნებისმიერი პროდუქტი საქართველოს წითელი ჯვრის მიერ შემუშავებული საჭიროებების სპეციალური სიიდან და მონაწილეობა მიიღონ საყოველთაო ქველმოქმედებაში სოციალურად დაუცველი მარტოხელა ხანდაზმულების მხარდასაჭერად.
,,საქართველოს წითელი ჯვრის საზოგადოებამ არაერთხელ განახორციელა აღნიშნული კამპანია ჰიპერმარკეტ „გუდვილთან“ ერთად. მოქალაქეების აქტიური ჩართულობისა და საქართველოს წითელი ჯვრის მოხალისეების თავდაუზოგავი შრომის შედეგად, შეგროვდა ამანათების ძალიან დიდი რაოდენობა და ჩვენ ერთობლივად შევძელით უამრავი ადამიანის დახმარება ქვეყნის მასშტაბით.
საქართველოს წითელი ჯვრის საზოგადოება მადლობას უხდის მოსახლეობას კამპანიაში აქტიური ჩართულობისთვის და მოხალისეებს იმ ფასდაუდებელი შრომისთვის, რასაც ყოველდღიურად გასწევენ ჩვენი ჰუმანიტარული მისიის წარმატებით განსახორციელებლად“, - ნათქვამია ინფორმაციაში.