ნიკა მელიას პოზიცია არის ძალიან მარტივი, ნიკამ საპყრობილე ყოველგვარი გირაოს და სხვა პირობების გარეშე უნდა დატოვოს, - ამის შესახებ „ინტერპრესნიუსს“ „ერთიანი ნაციონალური მოძრაობის“ ერთ-ერთმა წევრმა კობა ნაყოფიამ რუსთავის პენიტენციური დაწესებულების დატოვების შემდეგ განუცხადა.

ის პარტიის კიდევ ერთ წევრთან, აკაკი მინაშვილთან ერთად ნიკა მელიას რუსთავის პენიტენციურ დაწესებულებაში შეხვდა. კითხვაზე, მოაწერს თუ არა „ერთიანი ნაციონალური მოძრაობა“ შეთანხმებას ხელს, ნაყოფია პასუხობს, რომ ამასთან დაკავშირები მელია საპყრობილიდან გამოსვლის შემდეგ თანაპარტიელებს დაელაპარაკება.

„ხელმოწერასთან დაკავშირებით ბევრი კითხვა აქვს, როცა ის თავისუფალი იქნება, პარტიაში მოვა, თანაპარტიელებს დაელაპარაკება და შემდეგ მიიღებს სათანადო გადაწყვეტილებებს, ამაზე საუბარი ადრეა, განსაკუთრებით მაშინ, როცა ეს ადამიანი ციხეშია“, - განაცხადა ნაყოფიამ.