მოძრაობა „საქართველოსთვის“ მოუწოდებს შეთანხმების დოკუმენტზე ხელმომწერ პოლიტიკურ პარტიებს, რომ დაარეგისტრირონ დოკუმენტი საყოველთაო ამნისტიაზე, რომელიც ხელს შეუწყობს ე.წ. პოლიტიკური პატიმრების გათავისუფლებას და სამოქალაქო აქტივისტებზე პოლიტიკური დევნის შეწყვეტას.
როგორც ჟურნალისტებს მოძრაობა „საქართველოსთვის“ ერთ-ერთმა წევრმა ალექსანდრე მილორავამ განუცხადა, „დოკუმენტი 20 ივნისის ამნისტიის შესახებ „მოძრაობა საქართველოსთვის“ მიუღებელია, რადგან ის არის ანტისახელმწიფოებრივი და ემსახურება მხოლოდ რუსეთის ინტერესებს“.
მისივე განმარტებით, აღნიშნულ დოკუმენტს ანტისახელმწიფოებრივად მიიჩნევენ იმიტომ, რომ ის პასუხისმგებლობისგან ათავისუფლებს იმ ადამიანებს, „ვისაც ბრალი მიუძღვით 20 ივნისის აქციის დარბევაში“.
„ამიტომ, ჩვენ მოვუწოდებთ იმ პოლიტიკურ პარტიებს, რომლებმაც ხელის მოაწერეს შეთანხმებას, რომ სამშაბათს დაარეგისტრირონ დოკუმენტი საყოველთაო პოლიტიკურ ამნისტიაზე, რაც ხელს შეუწყობს ყველა პოლიტიკური პატიმრის გათავისუფლებას, სამოქალაქო აქტივისტებზე პოლიტიკური დევნის შეწყვეტას და იმ ადამიანების საქართველოში დაბრუნებას, ვინც პოლიტიკური ნიშნით ვერ ახერხებენ ჩამოსვლას. აქვე მინდა მოვუწოდო „ლელო საქართველოსთვის“ თავმჯდომარეს, მამუკა ხაზარაძეს, რომელიც დღეს ბრიუსელში იმყოფება და ყოველთვის ამბობს იმას, რომ მნიშვნელოვანია ეროვნული შეთანხმება, მხარი დაუჭიროს ამ შემოთავაზებას, წარუდგინოს ის შარლ მიშელს და სწორედ ამ ნაბიჯით დაიწყოს ეროვნული შერიგებისკენ მიმავალი გზა“, - აცხადებს ალექსანდრე მილორავა.
ამასთან, მისვე განმარტებით მოძრაობა „საქართველოსთვის“ ქვეყანაში ვადამდელი არჩევნების ჩატარებისთვის ბრძოლას აგრძელებს.