საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა უკრაინელ კოლეგასთან დმიტრო კულებასთან შეხვედრა გამართა. როგორც „ინტერპრესნიუსს“ საგარეო საქმეთა სამინისტროდან აცნობეს, შეხვედრაზე ხაზი გაესვა საქართველო-უკრაინის სტრატეგიულ პარტნიორობას და მეგობრობას.
მათივე ინფორმაციით, დავით ზალკალინმა მხარდაჭერა და სოლიდარობა გამოუცხადა უკრაინელ კოლეგას უკრაინის საზღვართან და დროებით ოკუპირებულ ტერიტორიებზე განვითარებული მოვლენების, ისევე როგორც ქვეყნის სუვერენიტეტის და ტერიტორიული მთლიანობის მიმართ.
„დავით ზალკალიანმა დმიტრო კულებას ასევე მიაწოდა ინფორმაცია საქართველოს ოკუპირებულ რეგიონებში არსებული ვითარების შესახებ. განხილულ იქნა საქართველოსა და უკრაინის ტერიტორიების ოკუპაციის საკითხზე საერთაშორისო საზოგადოების კონსოლიდაციისა და მხარდაჭერის მიზნით კოორდინირებული საქმიანობის, ისევე როგორც ნატო-სა და ევროკავშირში ინტეგრაციის წარმატებისთვის ერთობლივი ქმედებების განხორციელების საკითხები. მათ შორის განსაკუთრებული ყურადღება გამახვილდა ნატო-სა და აღმოსავლეთ პარტნიორობის სამიტების მოსამზადებელ საკითხებზე, რათა ორივე მიმართულებით ასახული იქნას საქართველოს და უკრაინის ინტერესები.
მინისტრებმა ასევე მიმოიხილეს ორმხრივი ურთიერთობის დღის წესრიგი, ხაზი გაუსვეს სხვადასხვა სფეროში წარმატებულ თანამშრომლობას და მისი განვითარების პოტენციალს. აღნიშნეს დაგეგმილი და სამომავლო მაღალი დონის ვიზიტების გაცვლის მნიშვნელობა და მიესალმნენ ქვეყნებს შორის უმაღლეს დონეზე არსებული კავშირების მაღალ დინამიკას“, - ნათქვამია საგარეო უწყების მიერ გავრცელებულ ინფორმაციაში.