ჩვენ არანაირი ბერკეტი და არც სურვილი არ გაგვაჩნია, რომ თამარ ჟვანიას გათავისუფლებისთვის მისხალი ენერგია დავხარჯოთ,- ამის შესახებ „გირჩის" ერთ - ერთმა ლიდერმა ვახტანგ მეგრელიშვილმა ჟურნალისტებთან განაცხადა. თუმცა, როგორც თავად ამბობს, ჟვანიას გადადგომით ბევრად მეტი სანდოობა ექნებოდა რეფორმებს, რომელიც შეთანხმების შედეგად უნდა განხორციელდეს.

„ჩვენ რომ ნორმალური ქვეყანა ვიყოთ, ასეთი კრიზისის პროვოცირებაში ვინც არის დამნაშავე, ის თვითონაც იგრძნობდა პასუხისმგებლობას, მაგრამ ჩვენი შეთანხმება უფრო მნიშვნელოვან საკითხებზეა, ვიდრე ცესკო- ს თავმჯდომარის გადადგობა-არგადადგომაა. მაგალითად, წესრიგი, რომელიც იქნება შემდეგი არჩევნების შემთხვევაში უფრო მნიშვნელოვანია, ვიდრე ადამიანი. თუმცა, თუ ადამიანიც გადადგება ბევრად მეტი სანდოობა ექნება იმ რეფორმებს, რომელიც ამ შეთანხმების საფუძველზე უნდა განხორციელდეს, ეს ხომ ბუნებრივია?! მაგრამ ჩვენ არანაირი ბერკეტი და არც სურვილი არ გაგვაჩნია, რომ თამარ ჟვანიას გათავისუფლებისთვის მისხალი ენერგია დავხარჯოთ,"- განაცხადა მეგრელიშვილმა.