ისრაელმა ღაზას სექტორში საპასუხო სარაკეტო თავდასხმა განახორციელა. ისრაელის არმიის განცხადებით, რაკეტების სამიზნეს ჰამასის მიწისქვეშა ინფრასტრუქტურა და სარაკეტო მოწყობილობები იყო.
გამოცემა Times of Israel-ის ინფორმაციით, მანამდე პალესტინის ტერიტორიიდან ისრაელის მიმართულებით მინიმუმ 20 რაკეტა ისროლეს. ისრაელის არმიაში აცხადებენ, რომ რაკეტების ნაწილი მანამდე აფეთქდა, სანამ ისრაელის ტერიტორიამდე მიაღწევდა, ნაწილი კი ქვეყნის საჰაერო თავდაცვამ მოიგერია.
გავრცელებული ინფორმაციით, ისრაელის სამხრეთ ნაწილში გამაფრთხილებელი სირენები ჩაირთო და მოსახლეობამ სპეციალურ თავშესაფრებს შეაფარა თავი. Associated Press- ის ინფორმაციით, თავდასხმაზე პასუხისმგებლობა „ჰამასს“ არ აუღია, მაგრამ მცირე დაჯგუფებამ, რომელიც მემარცხენე „პალესტინის განთავისუფლების სახალხო ფრონტთან“ არის დაკავშირებული, განაცხადა, რომ რაკეტების ნაწილი მათ ისროლეს. აღსანიშნავია, რომ სარაკეტო თავდასხმების შედეგად არცერთ მხარეს არავინ დაშავებულა.