„ოკუპანტები ქარელის რაიონის სოფლებში კვლავ აგრძელებენ უკანონო ბორდერიზაციის პროცესს“, - ამის შესახებ „ლელოს“ წევრი ლანა გალდავა სოციალურ ქსელში წერს.
ლანა გალდავას თქმით, უნდა დასრულდეს ოკუპანტის მიმართ საქართველოს ხელისუფლების „დანაშაულებრივად კაპიტულანტური“ დამოკიდებულება.
„ ოკუპანტები ქარელის რაიონის სოფლებში კვლავ აგრძელებენ უკანონო ბორდერიზაციის პროცესს. ხის ძელები სოფელ დვანში, დირბსა და ტახტისძირთან იცვლება ხნულებით და რაც ყველაზე მეტად საგანგაშოა, საქართველოს ხელისუფლების მიერ კონტროლირებადი ტერიტორიის სიღრმეში. ჰექტრობით სახნავ-სათესი მიწა ექცევა ოკუპირებულ ტერიტორიაზე და თუ პროცესი ასეთი სისწრაფით გაგრძელდა, საოკუპაციო-გამყოფი ხაზი ამ რაიონში, ოკუპანტების მუქარის შესაბამისად, გადმოიწევს მდინარე ფრონეზე.
მივმართავ საქართველოს ხელისუფლებას, განსაკუთრებით კი სახელმწიფო უსაფრთხოების სამსახურს, რატომ არ ხდება საოკუპაციო-გამყოფ ხაზებთან მუდმივი პატრულირება? რატომ არ ვარქმევთ ქვეყნის მიტაცების პროცესს ყოველდღიური ოკუპაციის სახელს და ხელისუფლების წარმომადგენლებიდან რატომ არავინ ჩავიდა უკანონო ბორდერიზაციის პროცესის აღსაკვეთად? უნდა დასრულდეს ოკუპანტის მიმართ საქართველოს ხელისუფლების დანაშაულებრივად კაპიტულანტური დამოკიდებულება, რომელიც დიდი ხანია გასცდა ასევე დანაშაულებრივ არგაღიზიანების პოლიტიკას.
მოვითხოვთ, სასწრაფო წესით, ოპოზიციის ჩართულობით, შემუშავებულ იქნას ქვეყნის დეოკუპაციის სტრატეგია და სამოქმედო გეგმა!“- წერს ლანა გალდავა.