შარლ მიშელის მიერ შედგენილ შეთანხმების დოკუმენტზე ხელმომწერ ოპოზიციური პარტიების წევრებსა და არასამთავრობო ორგანიზაციებს შორის შეხვედრა გაიმართა. შეხვედრას ,,ლელოს” ლიდერები ბადრი ჯაფარიძე, ანა ნაცვლიშვილი და ლევან სამუშია ესწრებოდნენ.
არასამთავრობო ორგანიზაციებთან სამუშაო შეხვედრა ორ საათზე მეტ ხანს გაგრძელდა. ოპოზიციური პარტიების ლიდერებმა და არასამთავრობო სექტორის წარმომადგენლებმა, დეტალურად იმსჯელეს კანონპროექტზე, რომლის ინიცირებაც სამშაბათს პარლამენტში უნდა მოხდეს.
„ლელოს“ ერთ-ერთი ლიდერის ანა ნაცვლიშვილის თქმით, ნებისმიერ კანონს, რომელსაც პარლამენტი მიიღებს აქვს კონკრეტული ჩარჩო, შეზღუდვა და ეს შეზღუდვები ვერ დაირღვევა ვერანაირი მიზნით.
,,ეს არის ამ ქვეყნის კონსტიტუციით დადგენილი ადამიანის უფლებები და მთელი რიგი საერთაშორისო სტანდარტები, რომელიც სახელმწიფოს უზღუდავს კონკრეტული მოქმედებების განხორციელებას, მათ შორის იმ ადამიანებთან მიმართებაში, რომლებსაც მძიმე უფლებადარღვევები აქვთ ჩადენილი”, - განაცხადა ანა ნაცვლიშვილმა.