ოპოზიციური პარტიების წარმომადგენლები პარლამენტში მივიდნენ. აღნიშნულით მე-10 მოწვევის პარლამენტისადმი მათი თითქმის 6-თვიანი ბოიკოტი დასრულდა.

ოპოზიციონერი დეპუტატების საკანონმდებლო ორგანოში მისვლას, ადგილზე მყოფი სამოქალაქო აქტივისტების პროტესტი მოჰყვა. შესაბამისად, ოპოზიციის წარმომადგენლებს პარლამენტში შესვლა აქციის მონაწილეების შეძახილების ფონზე მოუწიათ. მომიტინგეები ოპოზიციონერი დეპუტატების მისამართით სკანდირებდნენ: „უნამუსო“, „მონა“. ასევე, აქციის მონაწილეები ოპოზიციონერებს მიმართავდნენ შეკითხვით: „რატომ მიგვატოვეთ“, რაზეც მათი პასუხი იყო, რომ „არ მიუტოვებიათ“.

ინფორმაციისთვის, დღეს პარლამენტში მივიდნენ: ზურაბ ჯაფარიძე, პაატა მანჯგალაძე, გიორგი ვაშაძე, ხათუნა სამნიძე, სალომე სამადაშვილი, ბადრი ჯაფარიძე, მამუკა ხაზარაძე, ვახტანგ მეგრელიშვილი, დავით უსუფაშვილი, არმაზ ახვლედიანი, ანა ნაცვლიშვილი, იაგო ხვიჩია, თეონა აქუბარდია.