ჩვენი კოლეგები ხელისუფლებიდან და ოპოზიციიდან ამნისტიის კანონპროექტზე მუშაობდნენ, მაგრამ ჩვენთვის არ დაუძახიათ, ამიტომ წარმოდგენა არ მაქვს რა ეტაპზეა ეს კანონპროექტი - ზოგადად იმის თქმა, რომ ამნისტიის კანონი არც ერთ პოლიციელს და არც ერთ სპეცრაზმელს არ უნდა შეეხოს, ჩემი აზრით, არ არის სწორი, - ამის შესახებ „გირჩის“ ერთ-ერთმა ლიდერმა იაგო ხვიჩიამ პარლამენტში შესვლისას ჟურნალისტებთან განაცხადა.
მისივე თქმით, ჯერჯერობით ერთმანეთს რასაც ვერ ვპატიობთ, ეს ერთმანეთის დასახიჩრებაა.
„თქვენ იცით, რომ ჩვენი კოლეგები ხელისუფლებიდან და ოპოზიციიდან ამნისტიის კანონპროექტზე მუშაობდნენ, მაგრამ ჩვენთვის არ დაუძახიათ, ამიტომ წარმოდგენა არ მაქვს რა ეტაპზეა ეს კანონპროექტი. ჩემი აზრით, უნდა იყოს ისე, როგორც ამას განმარტავენ ჩვენი მედიატორები და ფასილიტატორები ვისი ინიციატივითაც მოვაწერეთ ხელი ამ დოკუმენტს. ჯერ ვნახოთ წარმოდგენილი კანონპროექტი და შემდეგ ვიკამათოთ იმაზე, რომ ვიღაც კონკრეტულ ადამიანს შეეხება, არ შეეხება. ეს კანონპროექტი მიუღებელი იქნება თუ იქნება ამორალური, გააჩნია სხვადასხვა შემთხვევას, არიან პოლიციელები და სპეცრაზმელები, რომლებიც ცუდად იქცეოდნენ, მაგალითად, ვიღაცას მანქანაში ტენიდნენ, ან ვიღაცას ხელით შეეხნენ, ჩემი აზრით, ჩვენ თუ პატიების გზით მივდივართ, ერთმანეთის გალახვა ერთმანეთს უნდა ვაპატიოთ, ერთმანეთს რასაც ვერ ვპატიობთ ჯერჯერობით არის ერთმანეთის დასახიჩრება, ამიტომ მე მგონი აქ ბუნებრივად ისედაც არის ზღვარი გატარებული და ზოგადად იმის თქმა, რომ ამნისტიის კანონი არც ერთ პოლიციელს და არც ერთ სპეცრაზმელს არ უნდა შეეხოს, ჩემი აზრით, არ არის სწორი“, - განაცხადა ხვიჩიამ.
ამასთან, ხვიჩიას განცხადებით, „ნაციონალური მოძრაობის“ თავმჯდომარის ნიკა მელიას წინადადება, რომ ის მზად არის ციხიდან გირაოს მეშვეობით გამოვიდეს, დაგვიანებულია.
„ჩემი აზრით, კარგი ის არის, რომ ნიკა მელია იყოს გარეთ. დღეს არ ხდება კანონპროექტის მიღება, ეს არის მინიმუმ ერთთვიანი პროცედურა, თავისუფლებაში მყოფ ნიკა მელიასთან ერთად მე დარწმუნებული ვარ მივალთ იმ კონსესუსამდე, რომ არავის ამნისტია არ გვეთაკილოს. ნიკა მელიას წინადადება ცოტათი დაგვიანებულია“, - აღნიშნა იაგო ხვიჩიამ.