სოზარ სუბარი - „განახლებული რეგიონების“ პროგრამა რეგიონებში გააჩენს ახალ ეკონომიკურ შესაძლებლობებს, შექმნის ახალ სამუშაო ადგილებს და ახალი მიზიდულობის ცენტრებს

„საქართველო ვერ იქნება ვერც მდიდარი, ვერც ძლიერი და ვერც წარმატებული, თუ მისი თითოეული რეგიონი არ იქნება წარმატებული და არ იქნება ძლიერი. პრემიერ-მინისტრ ირაკლი ღარიბაშვილის მიერ ინიცირებული „განახლებული რეგიონების“ პროგრამა რეგიონებში გააჩენს ახალ ეკონომიკურ შესაძლებლობებს, შექმნის ახალ სამუშაო ადგილებს და ახალი მიზიდულობის ცენტრებს, - ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარმა, პარლამენტის პლენარულ სხდომაზე განაცხადა.

მისივე თქმით, მარტო პროექტის განხორციელების ეტაპზე დასაქმდება, დაახლოებით 15 000 ადამიანი და მთლიანობაში, პროექტისთვის განკუთვნილია 500 მლნ ლარი, რომლიდანაც ერთი მესამედი დონორებისგან მოზიდული თანხებია.

„მინდა გამოვეხმაურო ძალიან მნიშვნელოვან ინიციატივას, რომელიც გუშინ, საქართველოს პრემიერ-მინისტრმა ირაკლი ღარიბაშვილმა გააჟღერა. მან „განახლებული რეგიონების“ 4-წლიან პროექტზე ისაუბრა, რომლის მიზანია, ქვეყნის ყველა რეგიონის, 63 მუნიციპალიტეტის სწრაფი და თანაბარი განვითარება.

საქართველო ვერ იქნება ვერც მდიდარი, ვერც ძლიერი და ვერც წარმატებული, თუ მისი თითოეული რეგიონი არ იქნება წარმატებული და არ იქნება ძლიერი, იმიტომ, რომ პატარა ქვეყანა ვართ და ერთმანეთთან არის დაკავშირებული ყოველი კუთხე-კუნჭული და ყოველი რეგიონი. ეს არის პროგრამა, რომელიც რეგიონებში გააჩენს ახალ ეკონომიკურ შესაძლებლობებს, შექმნის ახალ სამუშაო ადგილებს და ახალი მიზიდულობის ცენტრებს. მარტო პროექტის განხორციელების ეტაპზე დასაქმდება, დაახლოებით, 15 000 ადამიანი და მთლიანობაში, პროექტისთვის განკუთვნილია 500 მლნ ლარი, რომლიდანაც ერთი მესამედი არის დონორებისგან მოზიდული თანხები“, - განაცხადა რეგიონული პოლიტიკისა და თვითმმართველობის კომიტეტის თავმჯდომარემ.

სოზარ სუბარის თქმით, გათვალისწინებულია ისეთი პროექტების დაფინანსება, რომელიც მნიშვნელოვანია, როგორც კონკრეტული რეგიონებისთვის, ისე მთელი ქვეყნის განვითარებისთვის.

„ჩამოვთვლი რამდენიმე მიმართულებას, ეს არის კულტურული და ისტორიული მემკვიდრეობის ობიექტების რეაბილიტაცია, მუნიციპალიტეტების ადმინისტრაციული ცენტრების რეაბილიტაცია, რეკრეაციული სივრცეების მოწყობა და შესაბამისი ტურისტული ინფრასტრუქტურის განვითარება და სხვა. ყველაზე მნიშვნელოვანი, ალბათ, ის არის, რომ აქ შეიქმნება სპეციალური კომისია, სადაც ცენტრალური ხელისუფლება, ადგილობრივი თვითმმართველობა და უშუალოდ მოსახლეობა ერთად მიიღებენ გადაწყვეტილებას, რომელი პროექტები უნდა დაფინანსდეს და ასეთი ერთობლივი მუშაობისა და მოსახლეობასთან მუშაობის ძალიან კარგი გამოცდილება დაგროვდა, თუნდაც მხოლოდ სოფლის პროგრამა, რომ ავიღოთ. ასევე გასათვალისწინებელია, რომ ეს არის პროგრამა, რომელიც უკვე დღეიდან ამოქმედდება და უკვე აპრილშივე, რამდენიმე დღეში დაიწყება გამოცხადება კონკურსებისა და ტენდერების ამ პროექტებზე.

ეს არის სწორედ ის, რაზეც ჩვენი კოლეგები საუბრობდნენ, რომ პოლიტიკა უნდა იყოს ხალხისთვის და არა პოლიტიკა პოლიტიკისთვის და არა რაღაც კამათებისთვის და სულ ვიღაცისთვის გადაბრალებისთვის. სწორედ ხალხისთვის პოლიტიკის კარგი მაგალითია ეს პროგრამა“, - აღნიშნა სოზარ სუბარმა.

რამაზ საყვარელიძე - ოპოზიციიდან ბევრი შეეცდება სააკაშვილისგან გამიჯვნას და ლიდერის როლის მორგებას, მეეჭვება ეს წარმატებული მცდელობა იყოს, ამ ოპოზიციისთვის რთული იქნება სააკაშვილის დამარცხება
ქართული პრესის მიმოხილვა 06.05.2021
ალექსანდრე თვალჭრელიძე - მეჩვენება, რომ სააკაშვილი „ნაცმოძრაობის“ ტანზე მიბმული ლოდია, რომელიც მას ფსკერისკენ მიაქანებს
სინერჯი ჯგუფი კერძო კაპიტალის ოპერაციებში მონაწილეობისთვის (LBO) იურიდიულ პირებს იწვევს