გპირდებით, ყოველ ჯერზე ჩვენ გვექნება სათქმელი, რომ შეთანხმების სულისკვეთება და მისი თითოეული ნაწილი სრულდება პატიოსნად , - ამის შესახებ ოპოზიციონერმა დეპუტატმა არმაზ ახვლედიანმა გიორგი რურუას შეწყალების საკითხზე პარლამენტში განაცხადა.
როგორც ახვლედიანმა აღნიშნა, თუ არ იქნება გადადგმული კონკრეტული ნაბიჯები, შეთანხმება ვერ შესრულდება.
„არ მინდა გამოგვრჩეს ვინმე რომ მადლობა ვუთხრათ, ვინც შეთანხმებას ასრულებს. მათ შორის, პრეზიდენტ ზურაბიშვილს. იმიტომ, რომ თუ არ იქნება გადადგმული კონკრეტული ნაბიჯი ჩვენგან, სხვებისგან, შეთანხმება ვერ შესრულდება. ეს პრინციპულად მნიშვნელოვანია. გპირდებით, რომ ყოველ ჯერზე ჩვენ გვექნება სათქმელი, რომ შეთანხმების სულისკვეთება და მისი თითოეული ნაწილი სრულდება პატიოსნად. ახლა სწორედ ამ მიზნით დავბრუნდებით დარბაზში და განვაგრძობთ საუბარს „ოცნების“ ხელმძღვანელებთან“, - განაცხადა არმაზ ახვლედიანმა.
ცნობისთვის, საქართველოს პრეზიდენტმა სალომე ზურაბიშვილმა გიორგი რურუას შეწყალების აქტს ხელი მოაწერა.
„მივესალმები შეთანხმების პირველი ეტაპის შესრულებას! ჩემი მხრივ შევასრულე ჩემი სიტყვა და ხელი მოვაწერე შეწყალების აქტს!“, - აღნიშნულია პრეზიდენტის განცხადებაში.