დღეს გახდება ცნობილი, რამდენი ჯავშანი გაკეთდა თბილისში „სინოფარმზე“

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, 18 წელს ზემოთ მოქალაქეებისთვის ჩინური „სინოფარმის“ ვაქცინაზე რეგისტრაცია გუშინ დაიწყო და დღეს გახდება ცნობილი, დაახლოებით რამდენი ადგილია დაჯავშნილი.

როგორც მან „ინტერპრესნიუსს“ განუცხადა, წინასწარი მონაცემებით, ჯერჯერობით რეგიონებში რეგისტრაციის თვალსაზრისით ინტენსიური ჩაწერა არ არის.

„დაიწყო „სინოფარმის“ ვაქცინაზე რეგისტრაცია. ვნახოთ, 28 აპრილს გავანაწილებთ, რამდენი ადგილი დაიჯავშნა თბილისში და იმისდა მიხედვით მივიღებთ გადაწყვეტილებას. როგორც მეუბნებიან, ჯერჯერობით, რეგიონებში ისეთი ინტენსიური ჩაწერა არ არის“, - განაცხადა გამყრელიძემ.

მისი განმარტებით, მაისში, ივნისში და ივლისში საქართველოში ვაქცინებზე მარაგები თანდათან სერიოზულად შეივსება.

როგორც გამყრელიძემ აღნიშნა, ვაქცინაციასთან დაკავშირებით მოსახლეობის აქტივობა გაზრდილია და ამ თვალსაზრისით საზოგადოების მეტი ინფორმირებულობაა საჭირო. მისივე განმარტებით, სწორედ ვაქცინაციამ უნდა დაასრულოს კოვიდ პანდემია.

„ქვეყანაში ეპიდსიტუაცია გართულებულია, მოგეხსენებათ, ყოველდღიური შემთხვევები ათასზე მეტია, რაც ძალიან საყურადღებო და საგანგაშოა. ამიტომ არის აუცილებელი განსაკუთრებული სიფრთხილე, რეკომენდაციებისა და რეგულაციების დაცვა და მეორე მხრივ, ვაქცინაციის გააქტიურება, რომ როგორმე შედარებით ნაკლები დაზიანებით გავიაროთ მაისის თვე“, - განაცხადა გამყრელიძემ.

მისი თქმით, ქვეყანაში პირბადის ტარების მაჩვენებელი 80%-მდეა გაზრდილი.

ცნობისთვის, იმუნიზაციის საბჭოს სხდომის დასრულების შემდეგ ცნობილი გახდა, რომ 18 წელს ზემოთ ასაკის მოქალაქეებისთვის ჩინური ვაქცინით, "სინოფარმით" აცრაზე რეგისტრაციის პორტალი 27 აპრილიდან გაიხსნა. ამ დროისთვის პორტალის - https://booking.moh.gov.ge/Hmis/Hmis.Queue.Web/#/register თანახმად, თბილისში ჩინურ ვაქცინაზე "სინოფარმზე" სარეგისტრაციო ადგილები შევსებულია.

ხათუნა ლაგაზიძე - თუ ოპოზიციას რაციონალიზმი კი არა, თვითგადარჩენის ინსტინქტი მაინც შერჩენია, მოუწევთ გაერთიანება იმ საფრთხის წინააღმდეგ, რასაც ასპარეზზე ახალი პოლიტიკური ჯგუფების გამოჩენა ჰქვია
ქართული პრესის მიმოხილვა 07.05.2021
რამაზ საყვარელიძე - ოპოზიციიდან ბევრი შეეცდება სააკაშვილისგან გამიჯვნას და ლიდერის როლის მორგებას, მეეჭვება ეს წარმატებული მცდელობა იყოს, ამ ოპოზიციისთვის რთული იქნება სააკაშვილის დამარცხება
ბაქოში ევროპის ჩემპიონატის თასი ჩაიტანეს