იმედი მაქვს არ იქნება მცდელობა პარლამენტის ტრიბუნასთან პოლარიზაციის გადმოტანის, - ასე ეხმიანება უმრავლესობიდან გასული დეპუტატი ბექა ლილუაშვილი პარლამენტში ოპოზიციის ნაწილის შესვლას.
ლილუაშვილი ასევე გამოეხმაურა ამნისტიის პროექტს და აღნიშნა, რომ ის იდეალური შინაარსის არ არის, ისევე როგორც შეთანხმების შინაარსი არ არის იდეალური, რომელსაც ამის მიუხედავად ხელი მათაც მოაწერეს.
„იმედი მაქვს, რომ პარლამენტში შემოსული ოპოზიციის ნაწილის მთავარი ინტერესი ითვალისწინებს და ეფუძნება მათ უკან მყოფი მხარდამჭერების ინტერესებს და იმედი მაქვს, არ იქნება მცდელობა პოლარიზაციის გადმოტანის უბრალოდ პარლამენტის ტრიბუნასთან.
ჩვენ როცა ხელმოწერა გავაკეთეთ დოკუმენტზე, მაშინვე დავაფიქსირეთ პოზიცია, რომ შინაარსი ჩვენთვის არ არის იდეალური, იქ არის ჩადებული ისეთი პუნქტები, რომლითაც სახელმწიფო ძალიან დიდ ფასს იხდის, მაგრამ ამ ფასის გადახდა მხოლოდ მაშინ არის მიზანშეწონილი, თუ პოლიტიკური კრიზისი ქვეყანაში დამთავრდება, მათ შორის, არაიდეალური შინაარსი ეხებოდა ამნისტიის პროექტსაც, თუმცა, დაველოდოთ ამ პროექტს“, - განაცხადა ლილუაშვილმა.