წვრილმანი ხულიგნობის ჩადენასა და სამართალდამცავი პირის მოთხოვნისადმი დაუმორჩილებლობაზე ადმინისტრაციული პასუხისმგებლობის გამკაცრებას პარლამენტმა მხარი დაუჭირა

წვრილმანი ხულიგნობის ჩადენასა და სამართალდამცავი პირის მოთხოვნისადმი დაუმორჩილებლობაზე ადმინისტრაციული პასუხისმგებლობის გამკაცრებას პარლამენტმა, პირველი მოსმენით, 76 - ხმით დაუჭირა მხარი. ორმა დეპუტატმა პროექტის წინააღმდეგ მისცა ხმა.

“ადმინისტრაციულ სამართალდარღვევათა კოდექსში“ შესატანი ცვლილებების პროექტი, რომელიც უმრავლესობის დეპუტატებმა მოამზადეს, პლენარულ სხდომაზე დაჩქარებული წესით განიხილეს და პირველი მოსმენით მიიღეს.

პარლამენტის იურიდიულ საკითხთა კომიტეტის თავმჯდომარის ანრი ოხანაშვილის შეფასებით, პარლამენტში წარდგენილი კანონპროექტით კონკრეტულ პირებთან მიმართებით პროპორციული, სამართლიანი და თანაზომადი მიდგომა დგინდება.

როგორც ოხანაშვილი განმარტავს, ადამიანს, რომელიც ასეთ ქმედებას პირველად ჩაიდენს, მსუბუქი პასუხისმგებლობა დაეკისრება, ხოლო “ვინც არის რეციდივისტი“ და ასეთ ადმინისტრაციულ სამართალდარღვევას მრავალგზის სჩადის, უფრო გამკაცრებული პასუხისმგებლობა დაეკისრება.

“აქამდე ეს ყველაფერი ერთი დისპოზიციით იყო რეგულირებული. მნიშვნელობა არ ჰქონდა, ადამიანი ასეთ ადმინისტრაციულ დარღვევას ერთხელ სჩადიოდა თუ მრავალგზის. შემადგენლობა ერთი იყო და ახლა ამის დიფერენცირება ხდება“, - აცხადებს ანრი ოხანაშვილი.

წვრილმანი ხულიგნობის ჩადენაზე, ასევე, სამართალდამცავი ორგანოს თანამშრომლის მოთხოვნისადმი დაუმორჩილებლობასა ან ამ პირის შეურაცხყოფაზე ადმინისტრაციული პასუხისმგებლობა მკაცრდება.

პროექტით, წვრილმანი ხულიგნობის ჩადენისთვის ადმინისტრაციულ სახდელდადებული პირის მიერ ამავე ადმინისტრაციული სამართალდარღვევის განმეორებით ჩადენა გამოიწვევს სამართალდამრღვევის დაჯარიმებას 1500 ლარიდან 2000 ლარამდე ოდენობით ან ადმინისტრაციულ პატიმრობას 7 დღიდან 15 დღემდე ვადით.

გარდა ამისა, ახალი რედაქციით ყალიბდება “ადმინისტრაციულ სამართალდარღვევათა კოდექსის“ 173-ე მუხლი, რომლითაც განისაზღვრება, რომ სამსახურებრივი მოვალეობის შესრულების დროს სამართალდამცავი ორგანოს თანამშრომლის და სხვა შესაბამისი სახელმწიფო ორგანოს წარმომადგენლის კანონიერი განკარგულებისადმი ან მოთხოვნისადმი ერთხელ დაუმორჩილებლობა, ან ამ პირის სიტყვიერი შეურაცხყოფა, მის მიმართ სხვა შეურაცხმყოფელი ქმედების ერთხელ ჩადენა გამოიწვევს სამართალდამრღვევის დაჯარიმებას 2000 ლარიდან 3000 ლარამდე ოდენობით ან ადმინისტრაციულ პატიმრობას 15 დღემდე ვადით, ხოლო ამავე ქმედების განმეორებით ჩადენა - სამართალდამრღვევის დაჯარიმებას 3500 ლარიდან 4500 ლარამდე ოდენობით ან ადმინისტრაციულ პატიმრობას 10 დღიდან 15 დღემდე ვადით.

როგორც პროექტის განმარტებით ბარათში ვკითხულობთ, სტატისტიკური მონაცემებიდან ნათელია, რომ “ადმინისტრაციულ სამართალდარღვევათა კოდექსის“ 166-ე და 173-ე მუხლებით გათვალისწინებული ადმინისტრაციული სამართალდარღვევების ჩადენისთვის ამჟამად მოქმედი სახდელის ზომა ვერ უზრუნველყოფს ამ სამართალდარღვევათა ჩადენის პრევენციას. აღნიშნული სამართალდარღვევები ხელყოფენ საზოგადოებრივ წესრიგსა და მმართველობის წესს.

“მზარდია აღნიშნული მუხლებით გათვალისწინებული ადმინისტრაციული სამართალდარღვევის ჩადენის შემთხვევები. კერძოდ, 2018 წელს 166-ე მუხლით გათვალისწინებული ადმინისტრაციული სამართალდარღვევის ჩადენის 4 452 შემთხვევა გამოვლინდა, 2019 წელს კი - 5175. რაც შეეხება საქართველოს ადმინისტრაციულ სამართალდარღვევათა კოდექსის 173-ე მუხლით გათვალისწინებულ სამართალდარღვევას, 2018 წელს აღნიშნული მუხლით გათვალისწინებული სამართალდარღვევის 4761 შემთხვევა გამოვლინდა, ხოლო 2019 წელს - 5801. 166-ე და 173-ე მუხლებით გათვალისწინებული ადმინისტრაციული სამართალდარღვევის ჩადენის შემთხვევების საკმაოდ მაღალი მაჩვენებელი დაფიქსირდა 2020 წელსაც.

კერძოდ, 2020 წელს 166-ე მუხლით გათვალისწინებული ადმინისტრაციული სამართალდარღვევის ჩადენის 3452 შემთხვევა იქნა გამოვლენილი; 173-ე მუხლით გათვალისწინებული ადმინისტრაციული სამართალდარღვევის კი - 4201“, - ნათქვამია პროექტის განმარტებით ბარათში.

იაგო კაჭკაჭიშვილი - პოლიტიკური პროექტი, რომლის მიზანია „ქართულმა ოცნებამ“ ადგილობრივ არჩევნებში ამომრჩეველთა ხმების 43% არ აიღოს, რეალისტურია
ქართული პრესის მიმოხილვა 12.05.2021
ალექსეი გარანი - უკრაინის ნატო-ში გაწევრიანებას რუსეთის პრეზიდენტი პუტინი აჩქარებს
გოგა მელიქიძე - საპენსიო სააგენტო კაპიტალის ბაზარზე საგრძნობლად გააქტიურდება
როგორ გავხადოთ თქვენი ქალაქი ჭკვიანი და უსაფრთხო: გადაწყვეტილება Ekin-ისგან ხელოვნური ინტელექტის საფუძველზე
ალექსანდრე ჭავჭავაძის წინანდლის სახლ-მუზეუმში საგამოფენო სეზონი გაიხსნა
"ბარაქამ" აგრომაღაზია და ფერმერთა მომსახურების ცენტრები გახსნა - რას სთავაზობს კომპანია ფერმერებს
"ვოლტი საქართველო" 3 წლის გახდა
"პური გულიანი" ქსელურ განვითარებას იწყებს
TKT.GE-ს ახალი სტრატეგიული მიმართულება - ავიაბილეთები დაემატა
"ვოლტი" უკვე წყნეთშია!