საგარეო უწყება - ვიშეგრადის ქვეყნების საგარეო საქმეთა მინისტრები ევროკავშირს „აღმოსავლეთ პარტნიორობის" სამიტზე ასოცირებული პარტნიორების ევროპული პერსპექტივის აღიარებისკენ მოუწოდებენ

დღეს ვიშეგრადის ჯგუფისა და აღმოსავლეთ პარტნიორობის ქვეყნების საგარეო საქმეთა მინისტრების შეხვედრა გაიმართა, რომლის დასრულების შემდეგაც, აღმოსავლეთ პარტნიორობაზე და დაგეგმილ სამიტზე ვიშეგრადის ოთხეულის ერთობლივი განცხადება მიიღეს. ამის შესახებ ინფორმაციას საგარეო საქმეთა სამინისტრო ავრცელებს.

უწყების ცნობით, განცხადებაში საქართველოს ტერიტორიების ოკუპაცია და ინციდენტები დაგმეს, რომელსაც ადგილი აქვს საოკუპაციო ხაზის გასწვრივ.

მათი ინფორმაციით, მინისტერიალში მონაწილეობდა საქართველოს ვიცე-პრემიერი, საგარეო საქმეთა მინისტრი დავით ზალკალიანი.

„ვიშეგრადის ოთხეულის ერთობლივ განცხადებაში მინისტერიალის მონაწილეებმა დაადასტურეს თავიანთი მხარდაჭერა აღმოსავლეთ პარტნიორობის, როგორც სამეზობლო პოლიტიკის სტრატეგიული განზომილების მიმართ და მოუწოდეს ევროკავშირის ინსტიტუტებს, აღმოსავლეთ პარტნიორობა დარჩეს პრიორიტეტულად ევროკავშირის დღის წესრიგში. მათ ხაზი გაუსვეს პარტნიორების ევროკავშირთან შემდგომი პოლიტიკური ასოცირებისა და ეკონომიკური ინტეგრაციის მნიშვნელობას.

ვიშეგრადის ოთხეული მოუწოდებს აღმოსავლეთ პარტნიორობის მომავალ სამიტს, აღიაროს ასოცირებული პარტნიორების ევროპული პერსპექტივა, ხოლო პარტნიორობის ფარგლებში დიფერენციის პრინციპით გაგრძელდეს თანამშრომლობა. ვიშეგრადის ოთხეული მზად არის, ასოცირებულ ტრიოსთან თანამშრომლობის გასაღრმავებლად და მხარს უჭერს ასოცირების შეთანხმებების განახლებას საერთო ინტერესების მიმართულებით. ამ კონტექსტში ისინი ემხრობიან ასოცირებული პარტნიორების ევროპულ ერთიან ბაზარში თანდათანობითი, სრული ინტეგრაციის იდეასაც.

ვიშეგრადის ოთხეული მიესალმა ასოცირებული პარტნიორების - საქართველოს, მოლდოვასა და უკრაინის არაფორმალურ დოკუმენტს პარტნიორობის მომავლის შესახებ, რომელიც მიზნად ისახავს ევროკავშირთან მათ უფრო ღრმა ჩართულობას. მინისტრები შეთანხმდნენ, რომ მოწინავე ქვეყნებს, რომლებიც ევროკავშირთან გაღრმავებული თანამშრომლობისკენ ისწრაფვიან, უფრო მჭიდრო ინტეგრაციის შემდგომი შესაძლებლობა უნდა მიეცეთ.

განცხადებაში მინისტრებმა დაადასტურეს პატივისცემა და მხარდაჭერა საერთაშორისოდ აღიარებულ საზღვრებში პარტნიორი სახელმწიფოების ტერიტორიული მთლიანობის, დამოუკიდებლობის, ერთიანობისა და სუვერენიტეტის მიმართ. მათ ხაზი გაუსვეს რეგიონში არსებული კონფლიქტების დაუყოვნებლივ მოგვარების აუცილებლობას საერთაშორისო სამართლის ნორმებისა და პრინციპების შესაბამისად და დაგმეს საქართველოს ტერიტორიების ოკუპაცია და ინციდენტები, რომელსაც ადგილი აქვს საოკუპაციო ხაზის გასწვრივ.

განცხადებაში აღინიშნა, რომ უსაფრთხოების ფართო კონცეფცია პარტნიორობის ფარგლებში უფრო კონკრეტულ ინიციატივებში უნდა ითარგმნოს. ევროკავშირმა დახმარება უნდა გაუწიოს პარტნიორ ქვეყნებს უსაფრთხოების სექტორის რეფორმების გატარებაში, მათ შორის, ჰიბრიდულ საფრთხეებთან და დეზინფორმაციასთან ეფექტიანად გასამკლავებლად.

განცხადებაში ასევე ხაზგასმულია ევროკავშირის დახმარების მნიშვნელობა პანდემიით გამოწვეული სოციალურ-ეკონომიკური რეაბილიტაციის პროცესში, მინისტრები მოუწოდებენ ეროკავშირს მეტი ძალისხმევა გასწიოს ვაქცინაციის მიმართულებით მათ შორის, COVAX პლატფორმის მეშვეობით.

ვიშეგრადის ოთხეულის მიერ გამოიხატა მზადყოფნა აღმოსავლეთ პარტნიორობის პოლიტიკის შემდგომ განვითარებაში აქტიური როლის შესასრულებლად, მათ შორის, სამიტის ფარგლებში შედეგებზე ორიენტირებული, ამბიციური დეკლარაციისა და მიზნების შეთანხმების ნაწილში”, - ნათქვამია ინფორმაციაში.

საგარეო უწყების ინფორმაციით, ვიშეგრადის ოთხეულისა და აღმოსავლეთ პარტნიორობის მინისტერიალი მნიშვნელოვანი ფორმატია პარტნიორობის პრიორიტეტული საკითხების განხილვისა და მიზნების მიღწევის საშუალებების იდენტიფიცირებისთვის. 2020 წელს ასევე ამოქმედდა „V4 აღმოსავლეთის სოლიდარობის პროგრამა" ,,აღმოსავლეთ პარტნიორობის'' ქვეყნებისთვის, ვიშეგრადის საერთაშორისო ფონდის ფარგლებში.

პაველ ფელგენგაუერი - ისრაელ-პალესტინის ზავის პირობები დამოკიდებული იქნება იმაზე, ისრაელი ღაზის სექტორს „ჰამასისაგან“ სრულად გაწმენდს და მოისურვებს თუ არა ამჯერად მასზე კონტროლის აბასის ადმინისტრაციისთვის გადაცემას
ქართული პრესის მიმოხილვა 14.05.2021
იაგო კაჭკაჭიშვილი - პოლიტიკური პროექტი, რომლის მიზანია „ქართულმა ოცნებამ“ ადგილობრივ არჩევნებში ამომრჩეველთა ხმების 43% არ აიღოს, რეალისტურია
ევროკრედიტსა და საქართველოს საავტომობილო სპორტის ფედერაციას შორის ურთიერთთანამშრომლობის მემორანდუმი გაფორმდა
კამპანიის „კაცები ზრუნავენ“ ფარგლებში, თბილისსა და ქუთაისში „მამების სკოლა“ იხსნება
სუპერმარკეტების ქსელ „მაგნიტის“ წამახალისებელ გათამაშებაში სუპერ პრიზი - ბინა გათამაშდა
კარაგანდაში შპს „ქაზ კარბონის“კუთვნილი ახალი ნახშირის გამამდიდრებელი ფაბრიკა გაიხსნა
თბილისში ქართულ-ფრანგული საკონდიტროების ქსელ Bisues-ის პირველი მაღაზია გაიხსნა