არ მგონია, კახა კუჭავა თავს იკლავდეს „ქართული ოცნების“ ინტერესების დაცვისთვის, - ამის შესახებ პოლიტიკოსმა ლევან გოგიჩაიშვილმა „პალიტრანიუსის“ გადაცემაში „360 გრადუსი“ განაცხადა.

გოგიჩაიშვილი აღნიშნავს, არჩილ თალაკვაძე ძალიან კორექტული თავმჯდომარე იყო და არც კუჭავაა ნეგატიური ადამიანი.

„კორექტულობის და ეტიკეტის თვალსაზრისით მას ეჭირა თავი. საბოლოო ჯამში თალაკვაძე არ არის ნეგატიური ადამიანი, არც კახა კუჭავა არ არის ნეგატიური ადამიანი, უბრალოდ, კახა პოლიტიკოსი არ არის, ტექნიკური მიმართულების ადამიანი, გადაწყვეტილების მიმღები არ არის, მაგრამ კარგი და სასიამოვნო მოსაუბრეა.

კახა კუჭავასთან ერთად სენატში ვარ ნამყოფი და შეხვედრებზე, დავდიოდით. იქ ოპოზიცია, რომ იყო, კახა საერთოდ ნეიტრალიტეტს იჭერდა. მე მიწევდა ოპონირება ოპოზიციასთან. რომ ვიხსენებ მის პოზიციონირებას უცხოელებთან არამგონია თავს იკლავდეს „ქართული ოცნების“ ინტერესების დაცვისთვის“, - განაცხადა გოგიჩაიშვილმა.

ცნობისთვის, საქართველოს პარლამენტის თავმჯდომარის თანამდებობა რამდენიმე დღის წინ კახა კუჭავამ დაიკავა.