პროფესიული კავშირების გაერთიანება საქართველოს პრემიერ-მინისტრს მიმართავს თხოვნით, „რუსთავის აზოტში“ მიმდინარე მოვლენებთან დაკავშირებით სოციალური პარტნიორობის სამმხრივი კომისიის სხდომა ჩაინიშნოს.
როგორც პროფკავშირების თავმჯდომარე ირაკლი პეტრიაშვილი აცხადებს, აუცილებელია, რომ ეს საკითხი კომისიის ფარგლებში განიხილონ.
„ბატონო ირაკლი, მოგეხსენებათ, მიმდინარე წლის 27 აპრილიდან სს „რუსთავის აზოტში“ მიმდინარეობს მასშტაბური გაფიცვა სახელფასო ანაზღაურების ზრდის მოთხოვნით. კომპანიის მენეჯმენტი დღემდე არ ერთვება კონსტრუქციულ მოლაპარაკებებში და ვერ აცნობიერებს სოციალური დიალოგის მნიშვნელობას. სს „რუსთავის აზოტი“ წლებია გამოირჩევა დასაქმებულთა შრომითი უფლებების სისტემატური იგნორირებით. შექმნილი მდგომარეობით უკიდურესად მძიმდება დასაქმებულთა ისედაც მძიმე მდგომარეობა და ამავდროულად, მნიშვნელოვნად ზარალდება ქვეყნის ეკონომიკა. ვფიქრობთ, აუცილებელია აღნიშნული საკითხის განხილვა სოციალური პარტნიორობის სამმხრივი კომისიის ფარგლებში, რომლის ერთ-ერთი მთავარი ფუნქციაცაა ქვეყანაში სოციალური პარტნიორობის განვითარების, აგრეთვე დასაქმებულებს, დამსაქმებლებსა და საქართველოს მთავრობას შორის სოციალური დიალოგის წარმართვის ხელშეწყობა ყველა დონეზე. ყოველივე ზემოაღნიშნულიდან გამომდინარე, ვიყენებთ საქართველოს მთავრობის 2013 წლის 7 ოქტომბრის #258 დადგენილების „სოციალური პარტნიორობის სამმხრივი კომისიის დებულების დამტკიცების შესახებ“ მე-6 მუხლით მონიჭებულ უფლებას და მოგმართავთ თხოვნით, უმოკლეს ვადებში ჩანიშნოთ კომისიის რიგგარეშე სხდომა“, - აცხადებს ირაკლი პეტრიაშვლი.
ცნობისთვის, „რუსთავის აზოტის“ თანამშრომლები მეოთხე დღეა ხელფასების 50%-ით გაზრდის მოთხოვნით, საპროტესტო აქციას მართავენ. მათ საწარმოს ცენტრალური შესასვლელი აქვთ ბლოკირებული. 2000-მდე თანამშრომელი მეოთხე დღეა გაფიცულია, რამაც „აზოტის" წარმოების სრული გაჩერება გამოიწვია. დღეისათვის „რუსთავის აზოტში“ მხოლოდ ჟანგბადის საამქრო ფუნქციონირებს, საიდანაც სამედიცინო დაწესებულებების ჟანგბადით მომარაგება ხდება.