ამბობდნენ, მელია როგორც სპეცრაზმით შეიყვანეს, ისე გახდება სპეცრაზმით ციხიდან გამოსაყვანიო, ახლა იხვეწება, ოღონდ ვინმემ გადაუხადოს გირაო, - ამის შესახებ ჟურნალისტებთან საპარლამენტო უმრავლესობის წევრმა, სოზარ სუბარმა განაცხადა.

მისივე თქმით, საჭიროა ეს მელიამ მკაფიოდ თქვას და ქვეტექსტებით არ ისაუბროს, რადგან თუ მისი თანხმობა არ იქნება, გირაოს არავინ გადაიხდის.

„ბოლო წუთამდე ნიკა მელია და მისი ადვოკატები ამბობდნენ, არავინ გაბედოს გირაოს გადახდა, მელია მაინც არ გამოვა ციხიდან, როგორც სპეცრაზმით შეიყვანეს, ისე გახდება სპეცრაზმით გამოსაყვანიო, ახლა იხვეწება, ოღონდ ვინმემ გადაიხადოს, არ დავთანხმდები, მაგრამ გამოვალ დიდი სიამოვნებითო. „ნაციონალური მოძრაობა“ ეძებს გზას, როგორ შემოვიდეს პარლამენტში ისე, რომ სახე შეინარჩუნოს, რადგან იცის, რომ მარგინალიზაცია ელოდება ქუჩაში, ნიკა მელიაც იძულებული გახდა გადაეთქვა ყველა გამონათქვამი. გადაიხდის გირაოს ის ევროპული ორგანიზაცია და გამოვა მელია გარეთ. დღემდე ამბობდა, არავინ გაბედოს გირაოს გადახდა ჩემი თანხმობის გარეშეო, არც არავინ გადაიხდის, თუ მისი თანხმობა არ იქნება, რადგან ამას ითხოვდა თვითონ, თუ სხვანაირად უნდა, მკაფიოდ თქვას ოღონდ ვინმემ გადაიხადეთო, ქვეტექსტებით კი არა,“ - განაცხადა სუბარმა.