„ევროპული საქართველო“ - ივერი მელაშვილსა და „მთავარი არხის“ გადამღებ ჯგუფზე თავდასხმა ივანიშვილის რეჟიმის მიერ წახალისებული და დაუსჯელი დანაშაულებების ბუნებრივი გაგრძელებაა
დავით გარეჯის მონასტერთან ივერი მელაშვილსა და „მთავარი არხის“ გადამღებ ჯგუფზე თავდასხმა ივანიშვილის რეჟიმის მიერ წახალისებული და დაუსჯელი დანაშაულებების ბუნებრივი გაგრძელებაა.
როგორც “ინტერპრესნიუსს” “ევროპული საქართველოდან” აცნობეს, მსგავსი საქმეები აშიშვლებს ხელისუფლების სურვილს, რომ ძალადობისა და პროპაგანდის დახმარებით მართოს ქვეყანა.
“გუშინ, გარეჯის მონასტერთან ივერი მელაშვილსა და „მთავარი არხის“ გადამღებ ჯგუფს თავს დაესხნენ. ეს ივანიშვილის რეჟიმის მიერ წახალისებული და დაუსჯელი დანაშაულებების ბუნებრივი გაგრძელება და მათი ნაწილია. ეს ამბავი, ისევე როგორც პარლამენტის მიერ აქტივისტების წინააღმდეგ გამკაცრებული კანონმდებლობა, ადასტურებს, რომ ხელისუფლება არ აპირებს იმ სულისკვეთების და მეთოდების შეცვლას, რითაც აქამდე მართავდა ამ ქვეყანას.
ამავე კონტექსტის განუყოფელი ნაწილია “ქართული ოცნების” მორჩილი პოლიციისა და სასამართლოს მიერ ფირუზ წულუკიძის, რეზო წულუკიძისა და ირაკლი ჭელიძის დაკავება. ამ ადამიანებმა რიონის ხეობაში პროტესტის მონაწილეებს სოლიდარობა გამოუცხადეს. ამას კი ხელისუფლების მხრიდან პროვოკაციის მოწყობა და მათი დაკავება მოჰყვა. ეს და მსგავსი საქმეები აშიშვლებს ხელისუფლების სურვილს კვლავ ძალადობის, პოლიტიკური დევნის, სიცრუის და სიძულვილის პროპაგანდის დახმარებით მართოს ქვეყანა”, - ნათქვამია განცხადებაში.
