ამნისტიასთან დაკავშირებით ორივე მხარე უჩხიკინებს - "ნაციონალური მოძრაობა" და ოპოზიციის ნაწილი ნიკა მელიასთვის სახის შენარჩუნებას ცდილობს, "ქართული ოცნების" სურვილია, ამნისტია რაც შეიძლება მეტ პოლიციელზე გავრცელდეს, ხოლო მელია რაც შეიძლება მეტად დააკნინონ, - ამის შესახებ ჟურნალისტებს პარლამენტის წევრმა ალეკო ელისაშვილმა განუცხადა.
მისივე თქმით, ამნისტიაზე ამდენი ლაპარაკი ძალიან არასერიოზულია.
"ამნისტიის შესახებ ცალ-ცალკე კანონპროექტების დარეგისტრირება იმას ნიშნავს, რომ ვერც "ქართული ოცნება" და ვერც ოპოზიციის ნაწილი იმ სულისკვეთებას ვერ ხვდება, რაზეც შევთანხმდით. ჩვენ შევთანხმდით, რომ ერთ, საერთო ამნისტიის კანონს დავუჭერდით მხარს. არ შევთანხმებულვართ იმაზე, რომ ყველა თავთავის ვერსიას გააკეთებდა. რაღაცეების ცალ-ცალკე წერა ძალიან არასერიოზულია, მით უფრო, რომ ამ კანონპროექტებს შორის დიდი, რადიკალური სხვაობა არ არის. ჩვენ ორ მთავარ პრინციპზე შევთანხმდით, რომ ამნისტია ორივე მხარეზე თანაბრად გავრცელდებოდა და არ გავრცელდებოდა დამსახიჩრებლებზე. სხვა რა გვინდა ამ ამნისტიისგან - ქვეყანა ააყვავოს თუ სამუშაო ადგილები შექმნას ამნისტიამ?! ნუ ვართულებთ, ნუ ვხლართავთ და სერიოზულად იმ სერიოზულ საკითხებზე ვიმსჯელოთ, რაც დღეს ქვეყანას აწუხებს", - განუცხადა ჟურნალისტებს ალეკო ელისაშვილმა.