ვთხოვეთ, პრეზიდენტს ვეტო დაადოს კანონს და მოხდეს ცვლილების გადახედვა,- ამის შესახებ „რესპუბლიკური პარტიის“ თავმჯდომარე, ხათუნა სამნიძემ პრეზიდენტ სალომე ზურაბიშვილთან შეხვედრის შემდეგ ჟურნალისტებს განუცხადა.

როგორც სამნიძემ განმარტა, ადმინისტრაციულ სამართალდარღვევათა კოდექსში ცვლილებებს პრეზიდენტი დაადებს თუ არა ვეტოს მისთვის უცნობია.

„ვთხოვეთ, პრეზიდენტს ვეტო დაადოს ამ კანონს და ამ ცვლილების გადახედვა მოხდეს. ქალბატონმა სალომემ გაითვალისწინა ეს შეშფოთება, როგორც ოპოზიციური პარტიის მხრიდან, ასევე ჩვენი პარტნიორების. მას ჰქონდა რამდენიმე შეხვედრა ოპოზიციური პარტიის წარმომადგენლებთან. ვისაუბრეთ ამ კონკრეტულ ცვლილებებზე და შესაძლებლობებზე. მე არ მაქვს ინფორმაცია, რა გადაწყვეტილებას მიიღებს პრეზიდენტი. კიდევ რა დამატებითი შეხვედრები ექნება მას, მაგრამ ძალიან სერიოზულად მნიშვნელოვნად მიმაჩნია, რომ ის შეხვდა ოპოზიციურ პარტიებს და მოუსმინა მათ. ახლაც და მომავალშიც „ქართულმა ოცნებამ“ არ გადადგას მსგავსი ნაბიჯები და ასეთი დაჩქარებული წესით, დისკუსიის და ჩართულობის გარეშე არ მიიღოს ცვლილებები კანონში.

ჩემთვის მთავარია ფაქტი, რომ პრეზიდენტს მნიშვნელოვნად მიაჩნია ოპოზიციის, ასევე ჩვენი პარტნიორის პოზიცია. მიიღებს გადაწყვეტილებას, რა იქნება უფრო სწორი - იმისთვის, რომ ეს ცვლილებები აღარ იყოს ძალაში და ვეტო დაადოს, თუ მომავალში არ იყოს ისეთი შემთხვევები, როდესაც „ქართული ოცნება“ ასეთი ფორმით იღებს, ასეთ მძიმე ცვლილებებს კანონში. „ქართული ოცნების“ მხრიდან დაჩქარებული წესით ყოველგვარი დისკუსიის გარეშე ამ ტიპის ცვლილების შეტანის შემდეგ, მთავარი გზავნილი რაც მოვისმინეთ იყო ამერიკის საელჩოდან, რომელიც იყო მკაცრი და მიუთითებდა იმაზე, რომ „ქართულმა ოცნებამ“ ასეთი ცვლილება არ უნდა მიიღოს. უნდა იყოს დისკუსია და ჩართულობა ოპოზიციური პარტიების. ჩვენი მხრივ ხაზი გავუსვით, რომ ასეთი ცვლილება არის კიდევ ერთხელ თავდასხმა განსხვავებული აზრის მქონე ადამიანებზე, აქტივისტებზე“, - განაცხადა ხათუნა სამნიძემ.