ნიკა მელიას განწყობაა სამომავლოდ ის, რომ ოპოზიციურ პარტიებს შორის უნდა არსებობდეს მჭიდრო კოორდინაცია, რადგან ის მჭიდრო კოორდინაციის გარეშე ვერ ხედავს ოპოზიციის მიერ თვითმმართველობის არჩევნებზე 58%-ის აღების შესაძლებლობას, - ამის შესახებ „რესპუბლიკური პარტიის“ ლიდერმა თამარ კორძაიამ „ნაციონალური მოძრაობის“ თავმჯდომარის, ნიკა მელიას საპატიმროში მონახულების შემდეგ ჟურნალისტებს განუცხადა.
მისი თქმით, ნიკა მელია მზად არის, ყველასთან გააგრძელოს თანამშრომლობა იმისთვის, რომ „ქართულმა ოცნებამ“ ადგილობრივი თვითმმართველობის არჩევნებზე 43% ვერ მიიღოს.
“პირველ რიგში, მინდა მისი თხოვნა გავაჟღერო, ნიკა მელია ყველა ადამიანს მადლობას უხდის, ვისაც გული შესტკივა ამ ქვეყანაზე, იბრძოდა მისი გათავისუფლებისთვის და საერთოდ, იბრძვის იმისთვის, რომ ამ ქვეყანაში არსებობდეს პროგრესი და წინსვლა.
ნიკა მელიას განწყობაა სამომავლოდ ის, რომ ოპოზიციურ პარტიებს შორის უნდა არსებობდეს მჭიდრო კოორდინაცია, რადგან ის მჭიდრო კოორდინაციის გარეშე ვერ ხედავს ოპოზიციის მიერ თვითმმართველობის არჩევნებზე 58%-ის აღების შესაძლებლობას. ის მზად არის, გააგრძელოს ყველასთან თანამშრომლობა იმისთვის, რომ „ქართულმა ოცნებამ“ ვერ მიიღოს 43% ადგილობრივი თვითმართველობის არჩევნებზე“, - განაცხადა კორძაიამ.
ამასთან თამარ კორძაიას თქმით, ამნისტიის კანონპროექტთან დაკავშირებით „ნაციონალური მოძრაობის“ თავმჯდომარის, ნიკა მელიას პოზიცია უცვლელია.
კორძაია აცხადებს, რომ მელიას აზრით, მისი გათავისუფლება „ქართულ ოცნებაზეა“ დამოკიდებული.
„ქართული ოცნების“ მიერ წარმოდგენილ პროექტთან დაკავშირებით მას გაეღიმა, როდესაც შეკითხვა დავუსვი. ის ამბობს, რომ მისი პოზიცია ამნისტიასთან დაკავშირებით ისევ უცვლელია. ეს უკვე გაჟღერებულია. ის ამბობს, რომ მისი გათავისუფლების გასაღები „ქართული ოცნების“ ხელშია და მას შეუძლია ეს გასაღები გადაატრიალოს“,-განაცხადა კორძაიამ.
თამარ კორძაიამ იმედი გამოთქვა, რომ ნიკა მელია უახლოეს დღეებში თავისუფალი იქნება და სამომავლო გეგმებზე თავად ისაუბრებს.