ლატვიის პრეზიდენტის ეგის ლევიტსის განცხადებით, ევროპაში მეორე მსოფლიო ომის დასრულებას მისი ქვეყნისთვის თავისუფლება არ მოუტანია. ამის შესახებ „დოიჩე ველე“ იუწყება.

„სამწუხაროდ, ლატვიაში ომის დასრულებისთანავე, ერთი საოკუპაციო ხელისუფლება მეორეთი შეიცვალა“, - ნათქვამია ლატვიის პრეზიდენტის მიერ მედიისთვის გამოქვეყნებულ კომენტარში.

„ჩვენთვის ამ დღეს თავისუფლება არ მოუტანია, მაგრამ ჩვენ სოლიდარულები ვართ და გვიხარია დანიელებთან, ნორვეგიელებთან, ნიდერლანდელებთან, ბელგიელებთან, ფრანგებთან და სხვა ევროპელ ხალხთან ერთად, ვისაც ამ თარიღმა თავისუფლება მოუტანა“, - განაცხადა ლევიტსმა და აღნიშნა, რომ ლატვიის თავისუფლება მოვიდა მხოლოდ 45 წლის შემდეგ, როდესაც გათავისუფლდნენ აღმოსავლეთ ევროპის ხალხები, „როდესაც ჩვენ აღვადგინეთ ჩვენი დამოუკიდებლობა“.

მისივე თქმით, ლატვიას, როგორც სახელმწიფოს, მეორე მსოფლიო ომში მონაწილეობა არ მიუღია:

„ჩვენთვის ეს ომი უცხო იყო. ჩვენი ბიჭები ჯარში გაიწვიეს ორივე მეომარი მხრიდან, ისინი სხვათა მიზნებისთვის იბრძოდნენ უცხო არმიის შემადგენლობაში და ჩვენ გვქონდა უამრავი სამოქალაქო მსხვერპლი“, - აცხადებს ლატვიის პრეზიდენტი.