თბილისის მერმა, კახა კალაძემ ტყვარჩელის ქუჩაზე ე.წ ბარაკების ადგილას მოწყობილი სკვერი დაათვალიერა. ამის შესახებ ინფორმაციას თბილისის მერია ავრცელებს.

მათივე ინფორმაციით, სკვერი მას შემდეგ მოეწყო, რაც ტერიტორიის მესაკუთრე კომპანიასთან თბილისის მერიამ შეთანხმებას მიაღწია და ადგილმონაცვლეობა განხორციელდა.

პროექტის შედეგად, 1300 კვადრატულ მეტრ ფართობზე გამწვანების სამუშაოები ჩატარდა, ტერიტორიაზე სხვადასხვა სახის ხე-მცენარეები დაირგო, მოეწყო სარწყავი სისტემა და დაიგო რულონური ბალახი. ასევე, დამონტაჟდა ლედ განათების სისტემა და სკვერისთვის ყველა საჭირო ინვენტარი განთავსდა.

პროექტისთვის საბურთალოს გამგეობის ბიუჯეტიდან 250 000 ლარი გამოიყო, სამუშაოები კი კომპანიამ - „გრინსერვისი +“ შეასრულა.