სემეკში უსინათლოთა და მცირე მხედველთა ორგანიზაციის წარმომადგენლებთან შეხვედრა გაიმართა
საქართველოს ენერგეტიკისა და წყალმომარაგების მარეგულირებელ ეროვნულ კომისიაში უსინათლოთა და მცირე მხედველთა ორგანიზაციის წარმომადგენლებთან სამუშაო შეხვედრა გაიმართა.
მათივე ინფორმაციით, დავით ნარმანიამ და სემეკი-ს წარმომადგენლებმა შეხვედრაზე მოწვეულ სტუმრებს შეზღუდული შესაძლებლობის მქონე პირთა უფლებების დაცვის კუთხით სემეკი-ს სამოქმედო გეგმა გააცნეს და მათი კომენტარები და მოსაზრებები მოისმინეს.
„სემეკი-ს თავმჯდომარესთან ერთად შეხვედრას ესწრებოდა სემეკის წევრი გიორგი ფრუიძე და ენერგოომბუდსმენი სალომე ვარდიაშვილი.
სემეკი-ს მიზანია იმ პრიორიტეტების გამოკვეთა, რომელთა განხორციელებაც ხელს შეუწყობს შშმ პირთა უფლებების დაცვას. სემეკმა შეიმუშავა და დაამტკიცა „შეზღუდული შესაძლებლობის მქონე პირთა უფლებების დაცვის 2021 წლის სამოქმედო გეგმა“, რომლის ფარგლებშიც სხვადასხვა პროექტებთან ერთად მოხდება სემეკისა და ენერგოომბუდსმენის სამსახურის ვებგვერდების ადაპტირება მხედველობადაქვეითებული პირებისთვის.
სამოქმედო გეგმა შემუშავებულია „შეზღუდული შესაძლებლობების მქონე პირთა უფლებების“ გაეროს კონვენციისა და „შეზღუდული შესაძლებლობების მქონე პირთა უფლებების შესახებ“ საქართველოს კანონის საფუძველზე”, - აღნიშნულია გავრცელებულ ინფორმაციაში.
