სახელმწიფოს რაც შეეძლო, ყველაფერი გააკეთა და მამუკა ხაზარაძის ნაცვლად, სახელმწიფო პორტს ვერ ააშენებდა, - ასე უპასუხა „საქართველოსთვის“ თავმჯდომარემ გიორგი გახარიამ ტელეკომპანია „პალიტრანიუსის“ გადაცემის „360 გრადუსი“ ტელეწამყვანის, ემა ტუხიაშვილის კითხვას, რომელიც ანაკლიის ღრმაწყლოვან პორტს შეეხებოდა.

კითხვაზე, თვლის თუ არა, რომ ანაკლიის ღრმაწყლოვანი პორტის გაჩერებამ ქვეყნის ინტერესების მნიშვნელოვანი დაზიანება გამოიწვია და შეეძლო თუ არა მას, რაიმე გაგეკეთებინა იმისთვის, რომ ანაკლიის პორტი არ გაჩერებულიყო, გახარია პასუხობს, რომ „კერძო ინვესტორმა ვალდებულებები ვერ შეასრულა“.

„ანაკლიის ღრმაწყლოვანი პორტი ამ ქვეყანაში უნდა აშენდეს, სამწუხაროა, რომ ის პროექტი ჩაიშალა. ამ პროექტის ჩაშლის ძირითადი მიზანი უხარისხო ინვესტორი იყო, რომელმაც თავისი ვალდებულებები ვერ შეასრულა, ეს სიმართლეა, ეს ასეა. მე მაშინაც სიმართლეს ვამბობდი, ეს ობიქტური რეალობაა, ანაკლიის ღრმაწყლოვანი პორტის საინვესტიციო ხელშეკრულება, რომ ნახოთ რამდენჯერ არის შეცვლილი, რა იყო მისი საწყისი პირობები საერთაშორისო ტენდერის და რა გახდა ბოლოს, ეს ყველაფერი დანარჩენი ლირიკა და თავის მართლებაა. ფაქტია ერთადერთი, რომ კერძო ინვესტორმა თავისი ვალდებულებები ვერ შეასრულა, მიუხედავად იმისა, რომ სახელმწიფოს მხარდაჭერა დამატებით გაიზარდა 4-ჯერ, თუ 5-ჯერ, არ მინდა ახლა ზუსტად აქ ციფრები, პროექტის დაწყების ეტაპი, საინვესტიციო კონტრაქტი დაახლოებით 10-ჯერ არის გადახედილი, რაც შეეძლო სახელმწიფოს, ყველაფერი გააკეთა და მამუკა ხაზარაძის ნაცვლად, სახელმწიფო პორტს ვერ ააშენებდა. თუმცა, კიდევ ერთხელ ვამბობ, ღრმაწყლოვანი პორტი საქართველოს სჭირდება და უნდა აშენდეს“, - განაცხადა გახარიამ.

კითხვაზე, მას შემდეგ, რაც ის პრემიერ-მინისტრი აღარ არის, შეეცადა თუ არა, მამუკა ხაზარაძისთვის და ბადრი ჯაფარიძისთვის აეხსნა, ე.წ. წერილი მისი გაგზავნილი რომ არ არის, გახარია პასუხობს, „როგორ უნდა აეხსნა, ან დაერწმუნებინა, როცა მას არ გაუგზავნია“.