შემოდგომის რეფერენდუმის წინ ივანიშვილს და მის დამქაშებს ძალიან სერიოზულ სიურპრიზს ვუმზადებთ. ჩვენი ამოცანაა ივანიშვილის რეჟიმის, ამ გველეშაპის საქართველოდან ჩამოშორება, - ამის შესახებ საქართველოს მესამე პრეზიდენტმა მიხეილ სააკაშვილმა „ფეისბუქ“ ჩართვის დროს განაცხადა.
მისივე თქმით, აღნიშნული სიურპრიზის გამო ყველა ვინც განაწყენდება, შეუძლია „ცივი წყალი დალიოს“.
„შემოდგომის რეფერენდუმის წინ ივანიშვილს და მის დამქაშებს ძალიან სერიოზულ სიურპრიზს ვუმზადებთ და ამას სრულიად სერიოზულად ვამბობ. ქართველ ხალხს სასიამოვნო სიურპრიზს ვუმზადებთ, ვიღაცას გაუხარდება და ეს რამდენიმე მილიონი ქართველი იქნება და 100, 200, 300 კაცს ეწყინება. ყველამ ვისაც ეწყინება, როგორც ერთი, საქართველოს ყოფილი პრეზიდენტი ამბობდა „ცივი წყალი დალიოს“. ჩვენი ამოცანაა ივანიშვილის რეჟიმის, ამ გველეშაპის საქართველოდან ჩამოშორება.
ნამდვილად არავის არ ვურჩევ პარლამენტის კედლებში ჩაკეტვას. პარლამენტის კედლებში ჩაკეტვა ნიშნავს ისევ მათი თამაშის წესების ბოლომდე მიღებას. მთავარი სამიზნეა, შემოდგომაზე ამათი ჩამოშორება საქართველოს ხელისუფლებიდან“, - განაცხადა სააკაშვილმა.
მიხეილ სააკაშვილმა პოლიტიკური გაერთიანება „საქართველოსთვის“ თავმჯდომარის გიორგი გახარიას შესახებაც ისაუბრა.
როგორც სააკაშვილმა აღნიშნა, „საცოდავ რუსებს ისევ არ გაუმართლათ, ისევ რაღაც "ფუფლო" შერჩათ ხელში“.
„გახარიას შეხედეთ, აბა რისი პროექტია? კაცი 15 წელი ცხოვრობდა რუსეთში, მათ შორის, როცა გვბომბავდნენ ხმა არ ამოუღია. უკაცრავად და ფული საიდან აქვს? თუ ვინმემ უყურა ამ საცოდაობას ე.წ. პრესკონფერენციას, ისევ არ გაუმართლა საცოდავ რუსებს, ისევ რაღაც „ფუფლო“ შერჩათ ხელში. მესმის, რომ „ტიპი“ იყოს კიდევ“, - განაცხადა სააკაშვილმა.