აქციის მონაწილეები, რომლებიც სოფელ შუქრუთში განვითარებულ მოვლენებს აპროტესტებენ და აქციას თბილისში მართავენ, აცხადებენ,რომ რამდენიმე ადამიანის ჯანმრთელობის მდგომარეობა გაუარესდა.
როგორც პროტესტის ერთ-ერთი მონაწილე ჯანიკო ლაბაძე ჟურნალისტებთან აღნიშნავს, სუსტად არიან ქალებიც, რომლებიც პროტესტის ნიშნად შიმშილობენ.
" ჩვენ ვითხოვდით ხელისუფლების ჩართულობას იმაში, რომ მარტო არ დავრჩენილიყავით კომპანიასთან. სახელმწიფოს მხრიდან არანაირი გამოხმაურება არ ყოფილა, არც კი აღგვიქვამენ ადამიანებად, როდესაც ჩვენ ქვეყანაში წესით თავს დაცულად უნდა ვგრძნობდეთ და გვქონდეს ჯანსაღ გარემოში ცხოვრების უფლება",-აღნიშნავს ლაბაძე.
როგორც პროტესტის მონაწილე აცხადებს, მათთან სახალხო დამცველის წარმომადგენელიც იყო მისული, თუმცა, მისგან რაიმე ოფიციალური განცხადება ჯერ არ მოუსმენიათ.
ცნობისთვის, სოფელ შუქრუთის მცხოვრებლები პროტესტის უკიდურეს ფორმას მომართავენ. ადგილობრივების ნაწილმა პირი ამოიკერა. როგორც ისინი აცხადებენ, კომპანიის საქმიანობის გამო სახლები ენგრევათ, ხოლო "ჯორჯიან მანგანეზი" კომპენსაციის გადახდაზე უარს აცხადებს.