თსუ ჰუმანიტარულ მეცნიერებათა ფაკულტეტის არქეოლოგიის ინსტიტუტის ორგანიზებით, ვარძიის ისტორიულ-ხუროთმოძღვრულ კომპლექსში ახალგაზრდა არქეოლოგთა XII საერთაშორისო კონფერენცია გაიხსნა. ინფორმაციას უნივერსიტეტის პრესსამსახური ავრცელებს.

მათივე ინფორმაციით, კონფერენციის ფარგლებში არქეოლოგიასა და მომიჯნავე დარგებში განხორციელებული კვლევების შესახებ მოხსენებები წაიკითხეს და დისკუსიები გამართეს არქეოლოგებმა საქართველოდან, დიდი ბრიტანეთიდან, გერმანიიდან, იტალიიდან რუსეთიდან.

კონფერენცია ახალგაზრდა არქეოლოგებს საერთაშორისო სამეცნიერო სივრცეში ინტეგრაციისთვის ამზადებს, რაც ერთი წლის განმავლობაში გაკეთებული კვლევის სამეცნიერო კომისიის წინაშე წარდგენას და ამ კვლევის განხილვას გულისხმობს.

„კონფერენციას ყოველწლიურად 10-ზე მეტი ქვეყნის უნივერსიტეტების, მუზეუმების, სასწავლო-კვლევითი ცენტრების წარმომადგენლები ესწრებიან. ახალგაზრდა არქეოლოგთა XII საერთაშორისო კონფერენცია წელს ქართველი არქეოლოგის პროფესორ ოთარ ლორთქიფანიძის 90 წლისთავს მიეძღვნა“,-აღნიშნულია უნივერსიტეტის მიერ გავრცელებულ ინფორმაციაში.