გაუგებარია პარლამენტში შემოსვლა, როცა შარლ მიშელის დოკუმენტს ხელს არ აწერ - საბოლოო ჯამში, მათ ისევე მოუწევთ ამ დოკუმენტზე ხელმოწერა, როგორც თავდახრილებსა და დარცხვენილებს პარლამენტში შემოსვლა მოუწიათ, - ამის შესახებ ჟურნალისტებს „ქართული ოცნების“ დეპუტატმა ნიკოლოზ სამხარაძემ, „ნაციონალური მოძრაობის“ თაობაზე დასმული კითხვის პასუხად განუცხადა.
სამხარაძის შეფასებით, „ერთიანი ნაციონალური მოძრაობის“ წარმომადგენლებს საკუთარ ქცევებსა და პოლიტიკაში აცდენა აქვთ.
„თუკი პარლამენტში შარლ მიშელის დოკუმენტის ხელმოუწერლად შემოდიოდნენ, მაშინ რატომ არ შემოვიდნენ დეკემბერში და რა იყო მათ მიერ გამოცხადებული ბოიკოტის მიზეზი?! საზოგადოებას უნდა უთხრან, რატომ არ აწერენ ხელს შარლ მიშელის დოკუმენტს ან აქამდე რატომ არ შემოდიოდნენ პარლამენტში“, - განაცხადა ნიკოლოზ სამხარაძემ.