თუ ბატონ გახარიას სურს აქტიურად დამკვიდრდეს ოპოზიციურ ველზე, ის ძალიან სწრაფად უნდა გამოვიდეს პრემიერ - მინისტრის როლიდან, უფრო მკაფიოდ ჩამოაყალიბოს თავისი პოზიციები რასთან, ან ვისთან არის ოპოზიციაში, - ამის შესახებ „ევროპული საქართველოს“ პოლიტსაბჭოს თავმჯდომარემ გიგი წერეთელმა ყოფილ პრემიერ-მინისტრ, პარტია „საქართველოსთვის“ თავმჯდომარე გიორგი გახარიაზე საუბრისას განაცხადა.

როგორც წერეთელი აღნიშნავს, თუ გახარია არ ისაუბრებს არაფორმალურ მმართველობასა და კორუფციულ „ქეისებზე“, აბსოლუტურად ლეგიტიმურად მყარდება აზრი, რომ ის შესაძლოა, „შეთანხმებული სცენარი იყოს „ქართულ ოცნებასთან“

„თუ ის მკაფიოდ არ იტყვის ივანიშვილის როლზე, არაფორმალური მმართველობის ამ მიუღებელ ფორმაზე, თუ ის არ განმარტავს თავის პოზიციებს 20 ივნისთან დაკავშირებით, კორუფციულ „ქეისებსა“ თუ სხვაზე, აბსოლუტურად ლეგიტიმურად მყარდება აზრი, რომ ის შეიძლება შეთანხმებული სცენარი იყოს „ქართულ ოცნებასთან“ მომავალში რაღაც ხმების გაყოფის, თუ კოალიციის თვალსაზრისით“, - აღნიშნავს წერეთელი.