ნათია მეზვრიშვილი - კორუფციის წინააღმდეგ ბრძოლა ფრაგმენტულია და მეტწილად დაბალი რანგის მოხელეების მიმართ დევნის განხორციელებით შემოიფარგლება

კორუფციის წინააღმდეგ ბრძოლა ფრაგმენტულია და მეტწილად დაბალი რანგის მოხელეების მიმართ დევნის განხორციელებით შემოიფარგლება, - ამის შესახებ პოლიტიკური გაერთიანება „საქართველოსთვის" წევრი ნათია მეზვრიშვილი სოციალურ ქსელში წერს.

როგორც მეზვრიშვილი აცხადებს, კორუფციასთან დაკავშირებით გეგმების თაობაზე დეტალები პარტიის პროგრამაში იქნება წარმოდგენილი.

თუმცა, როგორც ის აღნიშნავს, სახელმწიფოს არ აქვს კორუფციის წინააღმდეგ გაცხადებულად მკაცრი მიდგომა და ერთიანი პოლიტიკა. კორუფციის გამოძიების ფუნქცია გადანაწილებულია სხვადასხვა უწყებაზე;

„არ არსებობს კორუფციის გამოძიების ქმედითი და პრაქტიკულად დამოუკიდებელი მექანიზმი;

კორუფციის წინააღმდეგ ბრძოლა ფრაგმენტულია და მეტწილად შემოიფარგლება დაბალი რანგის მოხელეების მიმართ დევნის განხორციელებით;

არაეფექტიანია დისციპლინური პასუხისმგებლობის შიდა მექანიზმები. სუსტია კოორდინაცია ამ მექანიზმებსა და საგამოძიებო უწყებებს შორის, რაც განსაკუთრებით მნიშვნელოვანია დანაშაულის პრევენციისთვის.

ეს მხოლოდ მცირედი ჩამონათვალია არსებული გამოწვევების. აღნიშნული მნიშვნელოვნად აფერხებს კორუფციის წინააღმდეგ ბრძოლის ეფექტიანობას და საბოლოო ჯამში, ერთგვარად ახალისებს კიდეც კორუფციას.

ჩვენ ჯერ კიდევ 6 თვის წინ გადავდგით კონკრეტული ნაბიჯები კორუფციის წინააღმდეგ სისტემური ბრძოლის მიმართულებით - დავაინიცირეთ კანონპროექტი და უწყებათაშორისი საბჭო იუსტიციის სამინისტროდან მთავრობის ადმინისტრაციაში გადმოვიტანეთ. ჯერ კიდევ მაშინ გვქონდა კონკრეტული გეგმა, რაც დღეს უკვე ასახულია ჩვენი პარტიის პროგრამაში და სულ მალე გამოხატულებას ჰპოვებს ჩვენი საპარლამენტო გუნდის მიერ დაინიცირებულ კონკრეტულ საკანონმდებლო წინადადებაში, რომელიც, პირველ რიგში, დამოუკიდებელი საგამოძიებო მექანიზმის შექმნას ისახავს მიზნად. ამ პროცესში აუცილებლად ვიმუშავებთ ექსპერტების და ყველა დაინტერესებული მხარის ჩართულობით”, - წერს მეზვრიშვილი.

თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
ქართული პრესის მიმოხილვა 08.08.2022
კახა ოქრიაშვილი აგვისტოს ომის მე-14 წლისთავთან დაკავშირებით განცხადებას ავრცელებს