საზედამხედველო ორგანოებს, ნინოწმინდის ბავშვთა პანსიონში მცხოვრები 50-ზე მეტი ბავშვის აღზრდის პროცესის სრულფასოვანი მონიტორინგის შესაძლებლობა დაუყოვნებლივ უნდა მიეცეს, - ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა, რითაც ნინოწმინდის ბავშვთა პანსიონატის ირგვლივ განვითარებულ მოვლენებს გამოეხმაურა.
მისივე თქმით, შემაშფოთებელია ის ინფორმაცია, რაც პანსიონში მცხოვრებ ბავშვებთან დაკავშირებით ვრცელდება.
“ნინოწმინდაში ბავშვთა პანსიონის გარშემო განვითარებული მოვლენები არის იმის ნიშანი, რომ სინამდვილეში ჩვენ გვყავს უპასუხისმგებლო ხელისუფლება.
შემაშფოთებელია ის ინფორმაცია, რაც პანსიონში მცხოვრებ ბავშვებთან დაკავშირებით ვრცელდება.
დაუყოვნებლივ უნდა მიეცეს შესაძლებლობა საზედამხედველო ორგანოებს პანსიონში მცხოვრები 50-ზე მეტი ბავშვის აღზრდის პროცესის სრულფასოვანი მონიტორინგის.
ჩვენ პატივს ვცემთ ტრადიციულ ღირებულებებს, მაგრამ კანონი ყველასთვის უნდა კანონობდეს და ამ მიმართულებით პრეფერენცია და ვინმესთვის უპირატესობის მინიჭება პრინციპულად მიუღებელია ჩვენთვის”, - განაცხადა გიორგი ვაშაძემ.