ეკა გიგაური - სენატორების პოზიციაა, რომ ქართველმა ხალხმა თვითონ უნდა იბრძოლოს  დემოკრატიისთვის და გადაწყვიტოს, რა არის მათთვის უკეთესი - ისინი, რა თქმა უნდა, დაგვეხმარებიან ინსტიტუტების აშენებაში

„საერთაშორისო გამჭვირვალობა - საქართველოს“ ხელმძღვანელის, ეკა გიგაურის განცხადებით, სენატორების პოზიციაა, რომ პირველ რიგში, ქართველმა ხალხმა უნდა იბრძოლოს დემოკრატიისთვის, ხალხმა უნდა გადაწყვიტოს რა არის მათთვის უკეთესი.

კითხვაზე, რა პოზიცია დააფიქსირეს არასამთავრობო სექტორთან შეხვედრაზე სენატორებმა სასამართლოში არსებულ „კლანზე", გიგაური აღნიშნავს, რომ სასამართლოში „კლანის" არსებობის შესახებ მათთვის ცნობილია.

მისივე თქმით, აუცილებელია ქვეყანაში სასამართლო სისტემის რეფორმა გატარდეს.

„ისინი თავის პოზიციას გამოხატავენ პრესკონფერენციაზე, ასეთ შეხვედრაზე არ ამბობენ საკუთარ პოზიციას. როგორც თქვენ აღნიშნეთ ის, რომ „კლანი" არის, მათ იციან. ეს ყველაფერი ნახსენები იქნა მოსმენების დროს, რა თქმა უნდა, მათთვისაც მნიშვნელოვანია, იმიტომ დავუთმეთ ჩვენც სასამართლოს ამდენი დრო, რომ სასამართლოს რეფორმა გასაკეთებელია ამ ქვეყანაში.

მთავარი, რაზეც საუბარი იყო, არის ის, რომ მათ ხშირად მიმართავენ სხვადასხვა პოლიტიკური პარტიის წარმომადგენლები და სხვებიც, თითქოს, ისინი ეკითხებიან, თქვენ გვითხარით, რა არის ჩვენი დემოკრატიისთვის უკეთესი. მათი პოზიცია ამაზე არის ის, რომ პირველ რიგში, ქართველმა ხალხმა თვითონ უნდა იბრძოლოს დემოკრატიისთვის, ქართველმა ხალხმა უნდა გადაწყვიტოს რა არის მათთვის უკეთესი. ისინი, რა თქმა უნდა, დაგვეხმარებიან ინსტიტუტების აშენებაში. ჩვენ ბრძოლას, ისინი არ იბრძოლებენ, ეს არის აქ მნიშვნელოვანი. ჩვენ, ქართველმა ხალხმა უნდა ვიბრძოლოთ ჩვენი უფლებებისა და დემოკრატიისთვის",- აღნიშნავს გიგაური.

ზურაბ ბატიაშვილი - საქართველოს მთავარი პრობლემა იმაშია, რომ საბჭოთა კავშირი იურიდიულად 31 წლის წინ კი დაიშალა, მაგრამ მენტალური საბჭოთა კავშირი ისევ აქაა და არსად წასულა
ქართული პრესის მიმოხილვა 15.08.2022
ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს