პროექტის „შეფასება განვითარებისათვის“ ფარგლებში კიდევ ერთი საცდელი ტესტირება ჩატარდა

შეფასების და გამოცდების ეროვნული ცენტრის ინფორმაციით, წარმატებით დასრულდა საცდელი ტესტირების კიდევ ერთი ეტაპი პროექტის „შეფასება განვითარებისათვის“ ფარგლებში.

მათივე ინფორმაციით, საცდელი ტესტირება საქართველოს მასშტაბით 350-მდე სკოლაში 1-4 ივნისს ჩატარდა. პროცესმა შეუფერხებლად ჩაიარა.

ტესტირების პროცესის მიმდინარეობას თბილისის 122-ე სკოლაში შეფასებისა და გამოცდების ეროვნული ცენტრის დირექტორი სოფიო გორგოძე ადგილზე გაეცნო.

„საცდელი ტესტირება ელექტრონულ ფორმატში ქართულსა და მათემატიკაში ჩატარდა და მასში მეოთხე და მეექვსე კლასის მოსწავლეები მონაწილეობდნენ. როგორც ქართულის, ისე მათემატიკის ტესტს საცდელი ტესტირების თითოეულ დღეს 3700-მდე მოსწავლე ასრულებდა.

ტესტირების მიზანია ანგარიშის ელექტრონული პლატფორმისა და ტესტირების ფორმატის დახვეწა, რათა მაქსიმალურად იყოს ის მორგებული სკოლის საჭიროებებთან. დიაგნოსტიკური შეფასება აგრეთვე დაეხმარება სკოლებს სასწავლო წლის შესაბამისად დაგეგმვაში.

საცდელი ტესტირება პროექტის ფარგლებში 2020 წლის ნოემბრის თვეშიც შედგა, სადაც მთელი საქართველოს მასშტაბით 1000-ზე მეტმა მოსწავლემ მიიღო მონაწილეობა. პროექტის ფარგლებში ჩატარდა დავალებების აპრობაციაც“, - ნათქვამია ცენტრის მიერ გავრცელებულ ინფორმაციაში.

ცნობისთვის, პროექტზე „შეფასება განვითარებისათვის“ მუშაობა შეფასებისა და გამოცდების ეროვნულმა ცენტრმა 2019 წელს დაიწყო. მისი მიზანია ელექტრონული პლატფორმის დახმარებით მეოთხე და მეექვსეკლასელების მიღწევების შეფასება სასწავლო წლის ბოლოს ქართულ ენასა და ლიტერატურასა (წიგნიერება) და მათემატიკაში (რაოდენობრივი წიგნიერება). შედეგები დაეხმარება მოსწავლეებსა და მშობლებს, თვალი ადევნონ სასწავლო პროცესის მანძილზე მიღწეულ პროგრესს და მიიღონ ინფორმაცია მოსწავლეთა სუსტი და ძლიერი მხარეების შესახებ. ეს პროექტი სკოლას შესაძლებლობას მისცემს, დააკვირდეს სწავლა-სწავლების ტენდენციებს როგორცცალკეული კლასის, ასევე ზოგადად, სკოლის დონეზე. გასათვალისწინებელია, რომ მიღებული ქულები მოსწავლის წლიურ შეფასებაზე არ აისახება.

თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
ქართული პრესის მიმოხილვა 08.08.2022
კახა ოქრიაშვილი აგვისტოს ომის მე-14 წლისთავთან დაკავშირებით განცხადებას ავრცელებს