საქართველოს პარლამენტი, ევროკავშირისა (EU) და გაეროს განვითარების პროგრამის (UNDP) ხელშეწყობით, სკოლის მოსწავლეებისთვის სამოქალაქო განათლების ახალ სასწავლო პროგრამას წარადგენს, რომელშიც მარტივად და გასაგებადაა გადმოცემული ინფორმაცია პარლამენტზე, დემოკრატიაზე და ქვეყნის მართვაში მოქალაქეთა ჩართულობაზე.

როგორც „ინტერპრესნიუსს“ პარლამენტიდან აცნობეს, მომავალ სასწავლო წელს, ახალი სასწავლო პროგრამა პილოტურად 50 საჯარო სკოლაში დაინერგება.

„მზიურის პარკში გამართულ ღონისძიებას სკოლის მოსწავლეები, მასწავლებლები, პარლამენტის წევრები და საგანმანათლებლო ორგანიზაციების წარმომადგენლები დაესწრებიან. ბავშვებისთვის გაიმართება სხვადასხვა გასართობი და შემეცნებითი აქტივობა - წიგნის კუთხე, ილუსტრაციების გაფერადება და იდეების დაფის შექმნა „მე რომ პარლამენტის წევრი ვიყო".

ხატვაში ბავშვებს დაეხმარა ცნობილი მხატვარი გამეზა, რომლის ილუსტრაციები შესულია ახალ სახელმძღვანელოებში.

ღონისძიებას დაესწრებიან: პარლამენტის თავმჯდომარე კახა კუჭავა, საქართველოს პარლამენტის განათლებისა და მეცნიერების კომიტეტის თავმჯდომარე შალვა პაპუაშვილი, ევროკავშირის ელჩი საქართველოში კარლ ჰარცელი, გაეროს განვითარების პროგრამის მოქმედი ხელმძღვანელი ანნა ჩერნიშოვა“,-ნათქვამია განცხადებაში.