თამარ გაბუნია - მალე დავასახელებთ თარიღს, როდის ჩამოვა „ფაიზერის“ მილიონზე მეტი დოზა - „ნოვოვაქსის“ შემოსვლის პერიოდს კოვაქსის პლატფორმა სექტემბრიდან ასახელებს

ის დაწესებულებები, რომელიც ჩართულია ვაქცინაციის პროგრამაში, განსაკუთრებით თბილისში არ არის საკმარისი იმისთვის, რომ დააკმაყოფილოს მოთხოვნა სრულად. „სინოვაკის“ დოზები თბილისში საკმარისია, თუმცა რიგ შემთხვევაში ვერ ხერხდება დარეგისტრირება, - ამის შესახებ ჯანდაცვის მინისტრის მოადგილე თამარ გაბუნიამ ვაქცინაციაზე საუბრისას განაცხადა.

როგორც გაბუნიამ ჟურნალისტებთან საუბრისას აღნიშნა, ვაქცინებზე მოთხოვნის სრულად დასაკმაყოფილებლად ვაქცინაციის პროგრამაში სამედიცინო დაწესებულებები ეტაპობრივად დაემატება. მისივე თქმით, სრული მოსახლეობის 60%-ის ასაცრელად დღეში 25 000-მდე ადამიანი უნდა აიცრას და ქვეყანაში ვაქცინის დოზების მოწოდებასთან დაკავშირებით იმედის მომცემი სურათია შექმნილი.

,,ვაქცინაციის პროგრამა საკმაოდ აქტიურად მიმდინარეობს. კარგია, რომ ბოლო პერიოდში 5000-მდე ადამიანი იტარებს ვაქცინაციას ყოველდღიურად. მაგრამ, რომ მივაღწიოთ სამიზნეს - მოსახლეობის 60%-ის აცრას წლის ბოლომდე, დღეში 20-25000 ადამიანის აცრა მოგვიწევს დღის განმავლობაში. იმედის მომცემი სურათი არის ვაქცინების მოწოდების ტენდენციასთან დაკავშირებით. ჩვენ შეთანხმებები გვაქვს სხვადასხვა მომწოდებლებთან, რაც ჯამურად ქმნის 3.7 მილიონ დოზას, რაც ჩვენ გვჭირდება მოზრდილი მოსახლეობის 60%-ის ვაქცინაციისათვის. თუმცა, უკვე დაწყებულია მუშაობა მოზარდების ვაქცინაციაზეც და მოგვიწევს ფიქრი იმაზე, რამდენად შევძლებთ მოზარდებზე ვაქცინაციის გავრცობას.

პირველი ეტაპი „ფაიზერთან“ მოლაპარაკებების დასრულებულია, ვმუშაობთ მეორე ეტაპზე და მალე გვექნება შესაძლებლობა საზოგადოებას კონკრეტული დეტალები გავაცნოთ. დავასახელებთ იმ თარიღს, როდის ჩამოვა „ფაიზერის“ მილიონზე მეტი დოზა. ასევე მიდის მუშაობა „სინოფარმთან“, „სინოვაკთან“ დამატებითი დოზების მობილიზაციაზე და კოვაქსის პლატფორმიდან „Johnson&Johnson-ის და „ნოვოვაქსის“. „ნოვოვაქსის“ შემოსვლის პერიოდს სექტემბრიდან ასახელებს კოვაქსის პლატფორმა. ეს არის საკმაოდ დიდი რაოდენობა ვაქცინების, ამისი ადმინისტრირებისთვის განიხილება დამატებითი სამედიცინო დაწესებულებების მობილიზების და პროგრამაში ჩართვის საკითხი. ის დაწესებულებები, რომელიც ჩართულია ვაქცინაციის პროგრამაში, განსაკუთრებით თბილისში, არ არის საკმარისი იმისთვის, რომ დააკმაყოფილოს მოთხოვნა სრულად. დღეს „სინოვაკის“ დოზებიც არის თბილისში საკმარისი, თუმცა რიგ შემთხვევაში ვერ ხერხდება დარეგისტრირება, რიგის დაჯავშნა, რადგანაც არ არის შესაბამისი ადგილები, შესაბამისად, ეს დაწესებულებები ეტაპობრივად დაემატება“, - აღნიშნა თამარ გაბუნიამ.

ალექსანდრე თვალჭრელიძე - თუ დაინიშნა რიგგარეშე საპარლამენტო არჩევნები, რისი ალბათობა რეალურია, 2024 წლის საპარლამენტო არჩევნების შედეგად ვერც ერთი პარტია გადამწყვეტ უმრავლესობას ვერ მოიპოვებს
ქართული პრესის მიმოხილვა 18.06.2021
ვიქტორ ყიფიანი - მოსკოვს ჰიბრიდულ-რევიზიონისტული საგარეო კურსის შესანარჩუნებლად სჭირდება ჟენევის მსგავსი ფორმატები, ძველი ან ახალი „წითელი ხაზების“ მონიშვნით საკუთარი და სხვისი ძალების მოსინჯვა
ჩვენ ყოველთვის ღია ვართ დისკუსიისთვის - სოციალური კვლევის ინსტიტუტი საქართველოს დაავადებათა კონტროლისა და საზოგადოებრივი ჯანმრთელობის ეროვნულ ცენტრს მიმართავს