გადავწყვიტეთ, რომ პირველიდან 5 ივლისის ჩათვლით გვექნება „თბილისი პრაიდის“ კვირეული, - ამის შესახებ "თბილისი პრაიდის" დირექტორმა გიორგი თაბაგარმა დღეს გამართულ პრესკონფერენციაზე განაცხადა.

როგორც მან აღნიშნა, წელს ექნებათ ღირსების მარში სოლიდარობისთვის ყველა იმ პროტესტის მიმართ, რომელიც ქვეყანაში არსებობს. ღირსების მარში 5 ივლისს, რუსთაველის გამზირზე გაიმართება. ამასთან, 1-5 ივლისს დაგეგმილ "თბილისი პრაიდის" კვირეულს სხვადასხვა ორგანიზაციის და მოძრაობის წარმომადგენლებიც უერთდებიან.

"2019 წლის შემდეგ 17 მაისზე როგორც საჯარო შეკრების დღეზე ვთქვით შეგნებული უარი მუდმივი დაპირისპირებების და დაძაბულობის გამო, რომელიც ამ დღესთან დაკავშირებით არსებობდა. 2019 წელს ჩვენ გვქონდა მცდელობა ღირსების მარშის გამართვის. გახსოვთ ალბათ ის მოვლენები, როდესაც რადიკალთა ჯგუფებმა ლევან ვასაძემ და მისმა მხარდამჭერებმა არ მოგვცეს ქუჩაში გასვლის შესაძლებლობა. სახელმწიფომ ვერ დაგვიცვა. მაშინ სახელმწიფოსგან მივიღეთ გზავნილი, რომ ჩვენ არ გიცავთ და რაც გინდათ ის გააკეთეთ. ჩვენმა მცდელობამ, რომ შინაგან საქმეთა სამინისტროსთან გვქონდა უსაფრთხოების საკითხებზე მოლაპარაკებები, მოეცათ მათ გარანტიები, რომ ისინი დაიცავდნენ ჩვენ უსაფრთხოებას, 2019 წელს ამაზე საჯაროდ თქვეს უარი. წელს გადავწყვიტეთ, რომ პირველიდან 5 ივლისის ჩათვლით გვექნება „თბილისი პრაიდის“ კვირეული, რომელიც სხვადასხვა კულტურულ თუ პოლიტიკურ ღონისძიებებს აერთიანებს. კონკრეტულად მინდა ვთქვა ღირსების მარშზე, რომელიც 5 ივლისს გაიმართება რუსთაველის გამზირზე. ჩვენ და ჩვენი მხარდამჭერები შევიკრიბებით, პარტნიორი ორგანიზაციები, პოლიტიკოსები, საერთაშორისო ორგანიზაციის წარმომადგენლები, რადგან ჰომოფობია ამ საზოგადოების უმნიშვნელოვანესი პრობლემაა და გვჭირდება ამ პროცესში ყველა ჩართული იყოს იმისთვის, რომ ამ ქვეყანაში დავძლიოთ სიძულვილი" , - განაცხადა თაბაგარმა.