გარემოს დაცვისა და სოფლის მეურნეობის მინისტრი ლევან დავითაშვილი თურქ კოლეგას შეხვდა

გარემოს დაცვისა და სოფლის მეურნეობის მინისტრი ლევან დავითაშვილი თურქეთის სოფლის მეურნეობის და სატყეო სამინისტროს დელეგაციის წევრებს შეხვდა. დელეგაციას მინისტრი ბექირ პაკდემირლი ხელმძღვანელობდა. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

მათივე ცნობით, შეხვედრაზე მხარეებმა ორ ქვეყანას შორის სოფლის მეურნეობისა და სატყეო მიმართულებით თანამშრომლობის გაღრმავების საკითხებზე იმსჯელეს.

შეხვედრის ფარგლებში, ხელი მოეწერა ცხოველთა ჯანმრთელობის შესახებ ურთიერთგაგების მემორანდუმს, რომელიც საქართველოდან ცხოველური წარმოშობის პროდუქტების ექსპორტის ზრდას შეუწყობს ხელს.

„ცხოველთა ჯანმრთელობის შესახებ ურთიერთგაგების მემორანდუმი წინგადადგმული ნაბიჯი იქნება ქვეყნებს შორის თანამშრომლობის გაღრმავების კუთხით. მემორანდუმის ფარგლებში გაწეული სამუშაო საშუალებას მისცემს ქართველ მწარმოებლებს, ცხოველებისა და ცხოველური წარმოშობის პროდუქტების ექსპორტი გაზარდონ“, - განაცხადა ლევან დავითაშვილმა.

ბექირ პაკდემირლიმ მზადყოფნა გამოთქვა, ქართულ მხარეს სოფლის მეურნეობის სხვადასხვა მიმართულებით თურქეთში დანერგილ ელექტრონულ სისტემებთან დაკავშირებული გამოცდილება გაუზიაროს.

„გვაქვს ფერმერთა და ცხოველთა ელექტრონულ რეგისტრაციის სისტემების წარმატებული პროგრამები; ასევე, გვაქვს ელექტრონული სასოფლო-სამეურნეო ბაზარი, რომელიც ფერმერების სარეალიზაციო ბაზრებზე წვდომის გაუმჯობესებას და შემოსავლების ზრდას ემსახურება“, - განაცხადა ბექირ პაკდემირლმა.

როგორც შეხვედრაზე საქართველოს გარემოს დაცვისა და სოფლის მეურნეობის მინისტრმა აღნიშნა, სამინისტრო, თურქულ მხარესთან ერთად, თევზჭერისა და სატყეო მიმართულებებით თანამშრომლობის მემორანდუმების პროექტზე მუშაობს, რაც მნიშვნელოვანი იქნება ორივე ქვეყნისთვის.

შეხვედრაზე საუბარი შეეხო სამეცნიერო, მარცვლეული კულტურების, სატყეო და სასურსათო პროდუქციის ნარჩენების მართვის მიმართულებით ქვეყნებს შორის თანამშრომლობის საკითხებს. ხაზგასმით აღინიშნა საქართველოს, თურქეთსა და აზერბაიჯანს შორის მეთხილეობის მიმართულებით სამმხრივი თანამშრომლობის მნიშვნელობა, რაც დადებითად აისახება როგორც საექსპორტო ბაზრების გაფართოების, ასევე თხილის რეალიზაციით მიღებულ შემოსავლებზე.

შეხვედრას თურქეთის საგანგებო და სრულუფლებიანი ელჩი საქართველოში, ფატმა ჯერენ იაზგანი, საქართველოს გარემოს დაცვისა და სოფლის მეურნეობის სამინისტროს შესაბამისი უწყებების და თურქეთის სოფლის მეურნეობისა და სატყეო სამინისტროს წარმომადგენლები ესწრებოდნენ.

ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს